‘కలర్ ఫొటో’ సినిమా ద్వారా హీరోగా పరిచయమవుతున్నారు సుహాస్. ప్రస్తుత లాక్‌డౌన్ సమయంలో సుహాస్ ఇంట్లోనే ఫ్యామిలీతో సమయం గడుపుతున్నారు. ఆయన తాజాగా హైదరాబాద్ టైమ్స్‌తో మాట్లాడారు. ఈ సందర్భంగా ‘కలర్ ఫొటో’ సినిమా గురించి పలు విషయాలను పంచుకున్నారు. కలర్ ఫొటో సినిమాలో నేను స్టూడెంట్ పాత్ర పోషిస్తున్నాను. అతను చాలా నల్లగా ఉంటాడు. తన చర్మ రంగు వల్ల వివక్ష ఎదుర్కొంటాడు. దీనివల్ల అభద్రతాభావంతో బతుకుతాడు. ఈ సినిమాకు కథే హీరో. ఆ కథను ముందుకు తీసుకెళ్లే ఒక పాత్ర నాది. 1997లో నూజివీడు, బందర్ ప్రాంతాల్లో ఈ సినిమా కథ నడుస్తుంది అని సుహాస్ చెప్పుకొచ్చారు. ఈ సినిమాలో సుహాస్‌కు జోడీగా చాందిని నటిస్తున్నారు. సునీల్ విలన్ పాత్ర పోషిస్తున్నారు. సునీల్‌తో కలిసి పనిచేసిన అనుభవాన్ని సుహాస్ పంచుకున్నారు. విలన్ పాత్ర కోసం సునీల్ గారిని తీసుకుందామని భావిస్తున్నట్టు డైరెక్టర్ సందీప్ చెప్పారు. అయితే, విలన్‌గా చేయడానికి ఆయన అంగీకరిస్తారా లేదా అని నాకు అనుమానంగా ఉండేది. లక్కీగా ఆయన యాక్సెప్ట్ చేశారు. ఆయన విలన్ రోల్‌ను అద్భుతంగా చేశారు. సినిమాలో ఆయన క్యారెక్టర్ భయానకంగా ఉంటుంది అని సుహాస్ వెల్లడించారు. తాను కీలకపాత్రలు పోషించిన రాబోయే చిత్రాల గురించి సుహాస్ మాట్లాడుతూ.. ఉమామహేశ్వర ఉగ్రరూపస్య సినిమా షూటింగ్‌ను పూర్తి చేసుకున్నాను. ఒరిజినల్ మూవీ ‘మహేషింతే ప్రతీకారం’లో సౌబిన్ షాహిర్ పోషించిన పాత్రను నేను తెలుగులో చేశాను. మలయాళంలో అది సూపర్ హిట్ సినిమా. ఈ సినిమాతో పాటు నితిన్ హీరోగా వస్తోన్న ‘రంగ్ దే’లో ఆయనకు స్నేహితుడి పాత్రలో నటిస్తున్నాను అని చెప్పారు.
‘కలర్ ఫొటో’లో ఆయన క్యారెక్టర్ భయానకంగా ఉంటుంది : సుహాస్
