లైంగిక వేధింపులు సరే… అలాంటి వాళ్లకు అవకాశాలు ఇచ్చే వారి సంగతేంటి ? : సింగర్

ప్రముఖ బాలీవుడ్ మ్యూజిక్ డైరెక్టర్ అను మాలిక్‌ పై సింగర్ సోనా మొహాపాత్ర కెరీర్ తొలినాళ్లలో అను తనను లైంగికంగా వేధించాడని ఏడాది క్రితం వెల్లడించారు. అయితే ఆ ఆరోపణలు చేసినందుకు సోనాకు కెరీర్ లేకుండా పోయింది. కానీ సోనీ టీవీ సంస్థ నిర్మిస్తున్న ‘ఇండియల్ ఐడల్’ షోకు అను మాలిక్‌ను జడ్జ్‌గా నియమించింది. ఇప్పటివరకు దాదాపు ముగ్గురు సింగర్స్ అను మాలిక్ బండారం బయటపెట్టారు. అయినా సోనీ టీవీ అతన్ని షో నుంచి తప్పించలేదు. దాంతో సోనా మహిళా, శిశు సంక్షేమ శాఖ మంత్రి స్మ్రతి ఇరానీ సాయం కోరారు. విద్యాసంస్థల్లో, పని చేసే ప్రదేశాల్లో లైంగికంగా వేధించేవారి వివరాలకు సంబంధించిన డేటా బేస్‌ను బయటికి తీస్తున్నామని ఇటీవల స్మ్రతి ప్రకటించారు. ఈ నేపథ్యంలో సోనా మొహాపాత్ర స్మ్రతికి ఓ లెటర్ రాశారు. “డియర్ స్మ్రతి ఇరానీ జీ… దేశంలో ఉన్న కామాంధుల వివరాలను వెతికి పట్టుకునే ప్రయత్నాన్ని మొదలుపెట్టినందుకు మిమ్మల్ని మెచ్చుకుంటున్నాను. కానీ అలాంటి వారి గురించి తెలిసి కూడా అవకాశాలు ఇస్తున్న సంస్థల మాటేంటి? ఇక్కడ నేను సోనీ టీవీ గురించి మాట్లాడుతున్నాను. ఇప్పటివరకు నాతో పాటు చాలా మంది యువతులు మ్యూజిక్ డైరెక్టర్ అను మాలిక్‌పై ఎన్నో ఫిర్యాదులు చేశాం. కానీ ఆ సంస్థ మాత్రం మా మాటలు పట్టించుకోకుండా ఆ కామాంధుడిని నెత్తిన పెట్టుకుని ఊరేగుతోంది. ఒకే వ్యక్తి గురించి ఇంత మంది కంప్లైంట్స్ చేస్తుంటే పట్టించుకోరా. తప్పు చేస్తున్న వారికి అవకాశాలు ఇస్తున్న సోనీ టీవీకి ఏదో రకంగా శిక్షపడదా? మన భారతదేశంలో చెడును జయించే మంచిని సెలబ్రేట్ చేసుకుంటాం. రావణుడిని చంపిన రాముడిని కొలుస్తాం, మహిషాసురుడిని చంపిన అమ్మవారిని పూజిస్తాం, హోలికను అంతం చేసినందుకు హోళీని జరుపుకుంటాం. ఈ పండుగలు మనలో పాజిటివ్ ఎనర్జీని నింపుతాయి. కానీ అను మాలిక్ లాంటి డేంజరస్ కామాంధుడు దేశానికే ఎంతో ప్రమాదం. వాడు తప్పు చేస్తున్నప్పుడు ఏదీ రికార్డు కాలేదు కాబట్టి ఆధారాలు లేవని సులువుగా తప్పించుకోవచ్చు అనుకుంటున్నాడు. దయచేసి ఈ విషయాన్ని కూడా కాస్త పరిశీలించాలని కోరుకుంటున్నాను” అని పేర్కొన్నారు. అయితే దీనిపై ఇప్పటివరకు స్మ్రతి ఇరానీ స్పందించలేదు.