స్వంత ఇల్లు అనేది ఒక సుందర స్వప్నం.. ఇంటి నిర్మాణం కోసం లోన్ తీసుకోవాలని భావిస్తున్నారా? అయితే మీకు అద్బుతమైన అవకాశం అందుబాటులో ఉంది. మోదీ సర్కార్ హౌజింగ్ ఫార్ ఆల్ పథకం కింద ఇంటి కోసం లోన్ తీసుకునే వారికి రాయితీ అందిస్తోంది. మీరు కూడా సొంతింటి కలను సాకారం చేసుకోవాలని భావిస్తే చక్కని అవకాశం. ప్రధాన్ మంత్రి ఆవాస్ యోజన (అర్బన్) స్కీమ్ పథకం కింద హోమ్ లోన్ కోసం దరఖాస్తు చేసుకోవచ్చు. ఆర్థికంగా వెనుకబడినవారు, తక్కువ ఆదాయం ఉన్న వారు ఈ పథకానికి అర్హులు.
ప్రభుత్వపు క్రెడిట్ లింక్డ్ సబ్సిడీ స్కీమ్ కింద హోమ్ లోన్ వడ్డీ రేటుపై రాయితీ పొందొచ్చు. ఈ పథకం కింద ప్రయోజనం పొందాలంటే కుటుంబంలోని ఎవరి పేరుపై కూడా సొంతిల్లు ఉండకూడదు. లోన్ తీసుకొని కట్టుకునే ఇల్లు ఇంట్లోని భార్య పేరుపై ఉండాలి. లేదంటే భార్యాభర్తల పేరుపై జాయింట్‌గా కూడా ఉండొచ్చు. రూ.3 లక్షల లోపు వార్షిక ఆదాయం ఉన్న వారు ఆర్థికంగా వెనుకబడిన కేటగిరి (ఈడబ్ల్యూఎస్) కిందకు వస్తారు. రూ.3 లక్షల నుంచి రూ.6 లక్షల మధ్యలో ఆదాయం ఉన్న వారు తక్కువ ఆదాయం ఉన్న గ్రూప్ (ఎల్ఐజీ) కిందకు వస్తారు.
అర్హత కలిగిన ఈడబ్ల్యూఎస్, ఎల్ఐజీ కేటగిరి కిందకు వచ్చే వారికి వడ్డీ రాయితీ 6.5 శాతంగా ఉంటుంది. 20 ఏళ్ల లోన్ టెన్యూర్‌కు వరకు ఇది వర్తిస్తుంది. కేవలం రూ.6 లక్షల వరకు రుణ మొత్తానికి మాత్రమే వడ్డీ సబ్సిడీ వర్తిస్తుంది. మిగిలిన రుణ మొత్తానికి సబ్సిడీ ప్రయోజనం లభించదు. ఉదాహరణకు రూ.6 లక్షల లోన్ తీసుకుంటే.. అప్పుడు వడ్డీ సబ్సిడీ రూ.2.67 లక్షలు అవుతుంది. ఈ మొత్తాన్ని లోన్ అమౌంట్‌ను తగ్గించుకుంటారు. అప్పుడు లోన్ మొత్తం రూ.3.33 లక్షలు అవుతుంది. అప్పుడు రుణ గ్రహీత ఈ రూ.3.33 లక్షలు చెల్లిస్తే సరిపోతుంది.
బ్యాంకులు, హౌసింగ్ ఫైనాన్స్ కంపెనీలు, రీజినల్ రూరల్ బ్యాంక్‌లు, స్టేట్ కోఆపరేటివ్ బ్యాంక్స్, అర్బన్ కో ఆపరేటివ్ బ్యాంక్స్, స్మాల్ ఫైనాన్స్ బ్యాంక్స్, రిజిస్టర్డ్ ఎన్‌బీఎఫ్‌సీలు వంటి వాటి వద్దకు వెళ్లి లోన్ కోసం దరఖాస్తు చేసుకోవచ్చు. అర్బన్ లోకల్ బాడీస్ ద్వారా కూడా రుణం కోసం అప్లై చేసుకునే అవకాశముంది. మీ సేవింగ్స్ ఖాతా ఉన్న బ్యాంకుకు వెళ్లి లోన్ కోసం సంప్రదిస్తే మంచిది. బ్యాంకులు రూ.6 లక్షల వరకు రుణానికి ఎలాంటి ప్రాసెసింగ్ ఫీజు వసూలు చేయకూడదు. రూ.6 లక్షలకు పైన మొత్తానికి ప్రాసెసింగ్ ఫీజు వసూలు చేయవచ్చు. లోన్ కోసం దరఖాస్తు చేసుకోవాలంటే ఇన్‌కమ్ ప్రూఫ్, హౌస్ ఓనర్‌షిప్ సర్టిఫికెట్, ఆధార్ వంటి డాక్యుమెంట్లు అవసరం అవుతాయి.