ఆసక్తి రేకెత్తిస్తున్న “లిసా” టీజర్

తెలుగు, తమిళ భాషల్లో తనకంటూ ప్రత్యేకమైన క్రేజ్ ను సంపాదించుకుంది హీరోయిన్ అంజలి. ప్రస్తుతం అంజలి నాయికా ప్రాధాన్యమున్న పాత్రల్నే ఎక్కువగా పోషిస్తోంది. తాజాగా అంజలి ప్రధాన పాత్రలో తెరకెక్కుతున్న హార్రర్ థ్రిల్లర్ “లిసా”. ఈ త్రీడి చిత్రం నుంచి తాజాగా టీజర్ ను విడుదల చేశారు చిత్రబృందం. ఈ టీజర్ ప్రేక్షకుల్లో ఆసక్తిని రేకెత్తిస్తోంది. అసలు దెయ్యాలు లేవని నిరూపించే ప్రయత్నం చేసిన అంజలికి ఎలాంటి అనుభవాలు ఎదురయ్యాయి అనేది చిత్ర కథాంశం. రాజు విశ్వనాథ్ దర్శకత్వం వహించిన ఈ చిత్రంలో టాలీవుడ్ నవ్వుల రారాజు బ్రహ్మానందం, కోలీవుడ్ టాప్ కమెడియన్ యోగిబాబు కీలకమైన పాత్రల్లో కనిపించనున్నారు. ఇదివరకే అంజలి హార్రర్ థ్రిల్లర్ చిత్రాల్లో నటించి ప్రేక్షకుల మెప్పును పొందింది. దీంతో ఈ సినిమాపై కూడా మంచి అంచనాలే ఉన్నాయి. త్వరలోనే ఈ చిత్రం ప్రేక్షకుల ముందుకు రానుంది.