మన ప్రణయ పయోధిలో మెరిసే
జ్ఞాపకాల ముత్యాలు -అపారం
ఆరు ఋతువుల్లో వైవిధ్య
వాతావరణాల సుధాసారం –
మన ప్రేమ మందిరం
ఒకే గూటి పక్షులం –
చిలుకా – గోరింకలం-
గురజాడ కలం లో
ముత్యాలసరమా-
జయదేవుని గానంలో
అష్టపదులు సారమా-
కవి కాళిదాసు లేఖినిలో
ప్రభవించిన ఊర్వశీ!
అన్నమయ్య కీర్తనల్లో
సౌందర్యరాశీ!
కవుల కలాల్లో
ప్రేమ హృదయాల్లో
ప్రవహించే నిత్య సత్యమే నీవు
భువిని బ్రతికించే ఆధారమే నీవు
ఓ లలనా!
నా స్వరమా!
శివరంజనీ రాగమా!
హంపి శిల్పమా!
బాపు గీచిన చిత్రమా!
రాయప్రోలు భావగీత మా!
నీవే అనంతకోటి భాషల ఏకత్వానివి-
నా అంతరంగ యవనికపై
చెరగని ప్రేమ చిత్రానివి-
-మహేంద్రాడ సింహాచలాచార్య,
టెక్కలి