మీటూ ఉద్యమం పుణ్యమా అని నటీమణులు తమకు ఎదురైన చేదు అనుభవాలను ఇప్పటికీ బయటపెడుతూనే ఉన్నారు. ఇప్పటికే ప్రముఖ మ్యూజిక్ కంపోజర్ అనూ మాలిక్ పై ఆరోపణలు వెల్లువెత్తుతున్నాయి. తాజాగా మరో నటి తాను ఎదుర్కొ్న్న క్యాస్టింగ్ కౌచ్ అనుభవం గురించి బయటపెట్టారు. హిందీలో 2000లో వచ్చిన ఫిజా సినిమాతో ఇషా తన కెరీర్‌ను ప్రారంభించారు. ఆ తర్వాత రామ్ గోపాల్ వర్మ తెరకెక్కించిన ‘కంపెనీ’ సినిమాలోని ‘ఖల్లాస్’ అనే ఐటెం సాంగ్‌తో ఇషాకు బ్రేక్ వచ్చింది. ఆ తర్వాత ఆమె చాలా సినిమాల్లో నటించే అవకాశం దక్కించుకున్నారు. 1998లో వచ్చిన ‘చంద్రలేఖ’ సినిమాతో ఇషా తన సినీ కెరీర్‌ను ప్రారంభించారు. ఇందులో నాగార్జున, రమ్యకృష్ణ కూడా నటించారు. ఆ తర్వాత 2017లో వచ్చిన ‘కేశవ’ సినిమాలో పోలీసు అధికారిణి పాత్రను పోషించారు. అయితే తన సినీ ప్రయాణంలో కొన్ని చేదు అనుభవాలను ఎదుర్కొన్నానని తెలిపారు. “నేనేదన్నా సినిమాకు సంతకం చేస్తే ఆ సినిమా నిర్మాత నా వద్దకు వచ్చి హీరోలతో కాస్త ఫ్రెండ్లీగా ఉండాలని చెప్పేవారు. వారితో రాసుకు పూసుకు తిరగాలని అన్నారు. అప్పుడే బాలీవుడ్‌లో నిలదొక్కుకోగలం అని చెప్పారు. ఓసారి నాకు ఓ పెద్ద సినిమాలో నటించే అవకాశం వచ్చింది. ఆ సినిమా నిర్మాత నాకు ఫోన్ చేసి నాతో కలిసి నటించే హీరోకు ఫోన్ చేసి మాట్లాడాలని చెప్పారు. అలాగైతేనే నాకు మంచి గుర్తింపు వస్తుందని చెప్పాడు. నేను నమ్మాను. ఆయన చెప్పినట్లుగానే ఆ హీరోకి ఫోన్ చేశాను. అతను ఫోన్ మాట్లాడినంత సేపు తన టైం టేబుల్ గురించి చెప్పాడు. ఆ తర్వాత నన్ను కలవాలని అన్నాడు. నేను ఓకే అన్నాను. ఆ తర్వాత ఎవరితో వస్తున్నావు అని అడిగాడు.
నా డ్రైవర్‌తో వస్తున్నాను అని చెప్పాను. అతను వద్దు అన్నాడు. ఎవ్వరినీ వెంట తీసుకురాకు. ఒంటరిగా రావాలని చెప్పాడు. అలా చేస్తే మనిద్దరి మధ్య ఏదో ఉందని అనుకుంటారని అన్నాడు. ఆ తర్వాత నాకు అతని వక్ర బుద్ధి అర్థమైంది. ఆ తర్వాత సినిమా నిర్మాతకు ఫోన్ చేసి నాలో ఉన్న ట్యాలెంట్‌ను చూసి నన్ను సినిమాలో తీసుకోండి. అంతేకానీ ఇలాంటి పిచ్చి పనులు చేయొద్దు అని చెప్పాను. సినిమాలో అవకాశాల కోసం ఇలాంటి పనులు చేయనని స్ట్రాంగ్‌గా వార్నింగ్ ఇచ్చాను. ఓ హీరోయిన్ ఇలా మాట్లాడితే హీరోలకు అస్సలు నచ్చదు. వారు తట్టుకోలేరు. దాంతో ఆ సినిమా నా చేజారిపోయింది. ఆ తర్వాత హీరోతో చనువుగా ఉన్న మరో హీరోయిన్‌కు అవకాశం వచ్చింది. కొన్నిసార్లు నన్ను సినిమాలో తీసుకున్నట్లే తీసుకుని వెంటనే తీసేసేవారు. ఓసారి సినిమా పూజా కార్యక్రమానికి వెళ్లేందుకు రెడీ అయ్యాను. ఇంతలో నాకు నిర్మాత ఫోన్ చేసి నన్ను సినిమా నుంచి తప్పించినట్లు చెప్పాడు. ‘కాంటే’ సినిమాలో సంజయ్ దత్‌ పక్కన నాకు మంచి పాత్ర దక్కింది. కానీ నేను నటించిన సన్నివేశాలన్నీ తీసేసి కేవలం ‘ఇష్క్ సముందర్’ అనే ఐటెం సాంగ్‌ని మాత్రమే ఉంచారు” అని వెల్లడించారు ఇషా.