బుల్లితెర బిగ్గెస్ట్ రియాలిటీ షోగా చెప్పుకుంటోన్న ‘బిగ్ బాస్’ సీజన్ 3 చివరి దశకు చేరుకుంది. అక్కినేని నాగార్జున హోస్ట్‌గా వ్యవహరిస్తోన్న ఈ సీజన్ విజేత ఎవరో మరో ఆరు రోజుల్లో తెలిసిపోనుంది. ఎప్పటిలానే టైటిల్ కోసం మొత్తం ఐదుగురు కంటెస్టెంట్లు పోటీపడుతున్నారు. ప్రస్తుతం ఇంట్లో ఉన్న శ్రీముఖి, బాబా భాస్కర్, అలీ రెజా, వరుణ్ సందేశ్, రాహుల్ సిప్లిగంజ్‌లలో ఎవరు టైటిల్ గెలుచుకుంటారా అని ప్రేక్షకులు ఆసక్తిగా ఎదురుచూస్తున్నారు.ఈ నేపథ్యంలో హౌజ్ లో ఉన్న ఐదుగురు కంటెస్టంట్ల గురించి ‘బిగ్ బాస్’ సీజన్ 2 విజేత కౌశల్ మండ ఆసక్తికర విషయాలు చెప్పారు. దీపావళి సందర్భంగా ప్రేక్షకులకు శుభాకాంక్షలు తెలియజేస్తూనే ‘బిగ్ బాస్’ సీజన్ 3లో ఫైనల్‌కు చేరిన కంటెస్టెంట్ల గురించి మాట్లాడారు. బిగ్ బాస్ అనేది తాను సపోర్ట్ చేయడం వల్లనో లేదంటే కంటెస్టెంట్ల ఫ్రెండ్స్ సపోర్ట్ వల్లనో గెలిచే గేమ్ కాదని కౌశల్ అన్నారు. ఎవరైతే ఎక్కువమంది ప్రేక్షకుల మనసుల్ని గెలుచుకుంటారో వాళ్లే విజేతగా నిలుస్తారని చెప్పారు. ప్రస్తుతం బిగ్ బాస్ హౌస్‌లో ఉన్న కంటెస్టెంట్ల గురించి మాట్లాడుతూ ముందుగా అలీ రెజా ప్రస్తావన తీసుకొచ్చారు కౌశల్. అలీ రెజా తన శిష్యుడని, 18 ఏళ్ల వయసప్పుడు తన దగ్గర మోడలింగ్ నేర్చుకోవడానికి వచ్చాడని చెప్పారు. అలీని తానే దగ్గరుండి మేకవర్ చేశానని, ఫస్ట్ ఫొటోషూట్ చేశానని వెల్లడించారు. అలీకి ఫస్ట్ ర్యాంప్ షోను కూడా తానే దగ్గరుండి నేర్పించానని తెలిపారు. అలీ ఫస్ట్ యాడ్ ఫిల్మ్‌ను కూడా తానే డైరెక్ట్ చేశానని చెప్పారు. అలాగే, అలీకి ఫస్ట్ రెమ్యునరేషన్ కూడా తన చేతుల మీదుగా ఇచ్చానని గర్వంగా చెప్పారు. ఎవరికైనా తనది లక్కీ హ్యాండ్ అని అన్నారు. ‘బిగ్ బాస్’ టాప్ 5లో అలీ రెజా ఉండటం తనకు ఎంతో ఆనందాన్ని ఇచ్చిందని కౌశల్ చెప్పారు. అలీ బయట కూడా చాలా ఎమోషనల్‌గా, అగ్రెసివ్‌గా ఉంటారని.. అలాగే అతను లవబుల్, ఫన్నీ కూడా అని కౌశల్ వెల్లడించారు. హౌస్‌లో కూడా అలానే ఉంటున్నాడని తెలిపారు. అనుకోకుండా మధ్యలో ఎలిమినేట్ అయినా ప్రేక్షకుల ఆశీర్వాదంతో మళ్లీ వచ్చాడని అన్నారు. అందరూ అలీని ప్రోత్సహిస్తున్నందుకు తనకు ఎంతో సంతోషంగా ఉందని, అతనికి ఎవరైతే ఓటేస్తున్నారో వారందరికీ కృతజ్ఞతలు తెలుపుతున్నానని చెప్పారు. ఆ తరవాత బాబా భాస్కర్, శ్రీముఖి, వరుణ్ సందేశ్, రాహుల్ సిప్లిగంజ్ గురించి కూడా కౌశల్ మాట్లాడారు.
బిగ్ బాస్-3 : అలీ నా శిష్యుడే… హౌజ్ మేట్స్ పై కౌశల్ కామెంట్స్
