‘అంకురం’సినిమాతో తనకంటూ ఒక ఇమేజ్‌ క్రియేట్‌ చేసుకున్న దర్శకుడు సీ ఉమా మహేశ్వరరావు తాజాగా తెరకెక్కించిన గొప్ప సందేశాత్మక చిత్రం ‘ఇట్లు అమ్మ’. అల‌నాటి నటి రేవతి ప్రధాన పాత్రలో నటించిన ఈ చిత్రాన్ని డా: బొమ్మకు మురళి అత్యంత ప్రతిష్టాత్మకంగా నిర్మించారు.
ఇటీవల సోని ఓటీటీ ద్వారా విడుదలైన ఈ చిత్రానికి భారీ స్పందన లభించింది. అంతేకాదు అవార్డులు కూడా వెల్లువెత్తుతున్నాయి. ఇప్పటికి 47 అవార్డులు వరించాయి. ఈ చిత్రానికి మంచి విజయాన్ని అందించిన తెలుగు ప్రేక్షకులకు మూవీ యూనిట్‌ కృతజ్ఞతలు చెప్పింది. ఈ చిత్రాన్ని అన్ని ప్రధాన భారతీయ భాషల్లోనూ విడుదల చేసేందుకు సన్నాహాలు చేస్తున్నారు.
అనూహ్య పరిస్థితుల్లో బిడ్డను కోల్పోతుంది సరస్వతి(రేవతి). ఏ పాపమూ ఎరుగని అసలు చీమకు కూడా హానీ తలపెట్టని తన బిడ్డ అర్థాంతరంగా ఎందుకు మాయమైపోయాడో తెలియక తల్లడిల్లిపోతుంది. తన కొడుకును ఎవరు, ఎందుకు చంపారనే ప్రశ్నలు ఆ ‘పిచ్చి తల్లి’ని నిద్ర పోనివ్వవు. అందుకే ఎలాగైనా తన కొడుకును పొట్టనపెట్టుకున్న వారి గురించి తెలుసు కోవాలనుకుని రోడ్డు మీదికి వస్తుంది. ఈ సత్యశోధనలో తల్లిగా ఆమెకెదురైన అనుభవాలు ఏంటి? ఆ తల్లి హంతకుడిని కనుక్కోగలిగిందా, తన కొడుకుతో పాటు, నేరస్తుడికి పట్టిన దురవస్థకు కారణాలను అన్వేషించే క్రమంలో ఆమె తీసుకున్న నిర్ణయాలే ‘ఇట్లు అమ్మ’మూవీ ..
చిత్ర నిర్మాత-బొమ్మకు క్రియేషన్స్ అధినేత డా: బొమ్మకు మురళి మాట్లాడుతూ…”రేవతి గారి నటన, ఉమామహేశ్వరావు దర్శకత్వ ప్రతిభ, మధు అంబట్ ఛాయాగ్రహణం, ప్రవీణ్ పూడి ఎడిటింగ్, సన్నీ ఎమ్.ఆర్ సంగీతం, గోరేటి వెంకన్న గానం-సాహిత్యం, సుచిత్ర చంద్రబోస్ కొరియోగ్రఫీ తదితర అంశాలు “ఇట్లు అమ్మ” చిత్రం ఓ దృశ్యకావ్యంగా తీర్చిదిద్దాయి.
ఇంత గొప్ప చిత్రం మా “బొమ్మకు క్రియేషన్స్”లో నిర్మాణం కావడం మాకెంతో గర్వకారణం. రేవతి గారు “ఇట్లు అమ్మ” చిత్రం తన కెరీర్ లో వన్ ఆఫ్ ది బెస్ట్ అని చెప్పడం బట్టి ఈ చిత్రాన్ని అంచనా వేయవచ్చు. ఈ చిత్రానికి అవార్డులతోపాటు రివార్డులు కూడా మా అంచనాలను మించి వస్తున్నాయి. ఈ చిత్ర నటీనటులు-సాంకేతిక నిపుణులు అందరికీ పేరుపేరునా హృదయపూర్వక కృతజ్ఞతలు” అన్నారు.