దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా (ఎస్‌బీఐ) తాజాగా తన కస్టమర్లకు అదిరిపోయే శుభవార్త అందించింది. ఎస్‌బీఐ తాజాగా నిర్ణయంతో కస్టమర్లకు ముందుగానే దీపావళి తీసుకువచ్చింది. రిజర్వు బ్యాంక్ ఆఫ్ ఇండియా (ఆర్‌బీఐ) తాజా రేట్ల కోత నేపథ్యంలో స్టేట్ బ్యాంక్ కూడా ఇప్పుడు ఎంసీఎల్ఆర్ రేటును మరోసారి తగ్గించింది. స్టేట్ బ్యాంక్.. మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేటు (ఎంసీఎల్ఆర్)లో 10 బేసిస్ పాయింట్ల మేర కోత విధించింది. అన్ని కాల పరిమితిల్లోని రుణాలకు ఇది వర్తిస్తుంది. అక్టోబర్ 10 నుంచి ఈ కొత్త నిర్ణయం అమలులోకి వస్తుంది. దీంతో రుణాలపై వడ్డీ రేట్లు దిగిరానున్నాయి. తాజా రేట్ల తగ్గింపుతో బ్యాంక్ ఏడాది ఎంసీఎల్ఆర్ 8.15 శాతం నుంచి 8.05 శాతానికి దిగొచ్చింది. దీంతో హోమ్ లోన్స్ చౌక వడ్డీకే అందుబాటులోకి వస్తాయి. స్టేట్ బ్యాంక్ ఎంసీఎల్ఆర్ తగ్గించడం 2019-20 ఆర్థిక సంవత్సరంలో ఇది ఆరోసారి కావడం గమనార్హం.
పండుగ సీజన్ నేపథ్యంలో కస్టమర్లకు తీపికబురు అందించేందుకు ఎంసీఎల్ఆర్ రేటు తగ్గించినట్లు ఎస్‌బీఐ ఒక ప్రకటనలో తెలిపింది. ఎంసీఎల్ఆర్‌ను 10 బేసిస్ పాయింట్లు తగ్గిస్తున్నట్లు పేర్కొంది. దీంతో లక్షల మంది కస్టమర్లకు ప్రయోజనం కలుగనుంది. అసెట్స్, డిపాజిట్లు, బ్రాంచులు, కస్టమర్లు, ఉద్యోగుల పరంగా చూస్తే దేశంలోనే ఎస్‌బీఐ అతిపెద్ద బ్యాంక్‌గా కొనసాగుతోంది. బ్యాంక్ నుంచి హోమ్ లోన్ తీసుకొని ఉంటే.. అది ఎంసీఎల్ఆర్ రేటుతో అనుసంధానమై ఉంటే.. తాజా రేట్ల కోతతో మీ ఈఎంఐ భారం వెంటనే దిగిరాకపోవచ్చు. ఎంసీఎల్ఆర్ రుణాలకు సాధారణంగా ఏడాది రీసెట్ నిబంధన ఉంటుంది. అయితే కొత్తగా రుణాలు తీసుకుంటున్న వారికి మాత్రం ప్రయోజనం ఉంటుంది. ఇకపోతే బ్యాంక్ రెపో లింక్డ్ హోమ్ లోన్స్ కూడా అందిస్తున్న విషయం తెలిసిందే. ఈ తరహా రుణాల్లో ఆర్‌బీఐ రెపో రేటు సవరించినప్పుడల్లా.. దీనికి అనుగుణంగా హోమ్ లోన్ రేటు కూడా మారుతుంది. ఆర్‌బీఐ రెపో రేటుకు పైన 265 బేసిస్ పాయింట్లకు అదనంగా రెపో హోమ్ లోన్ వడ్డీ రేటు ఉంటుంది. అలాగే బ్యాంక్ కొంత ప్రీమియం చార్జీలు కూడా వసూలు చేస్తుంది.
ఇంకా చాలా విషయాలు బయటకు రాలేదు… మీటూపై హీరోయిన్ అసంతృప్తి