సంచలన డైరెక్టర్ రామ్ గోపాల్ వర్మ తెరకెక్కించిన చిత్రం అమ్మ రాజ్యంలో కడప బిడ్డలు. ఆంధ్రప్రదేశ్ రాజకీయ అంశాలను కల్పిత పాత్రలతో తెరకెక్కించి భారీ అంచనాల మధ్య ప్రేక్షకుల ముందుకు తీసుకొచ్చారు. సినిమాకు మొదటి రోజు పాజిటివ్ టాక్ రావడం తో అభిమానులు, చిత్ర యూనిట్ సంబరాలు చేసుకుంటున్నారు. మరోవైపు ప్రజాశాంతి పార్టీ అధినేత కేఏ పాల్ మరోసారి దర్శకుడు రామ్ గోపాల్ వర్మపై సంచలన కామెంట్స్ చేశారు. ఈ మేరకు అమెరికా నుంచి మాట్లాడుతున్నట్లు పాల్‌కి సంబంధించిన ఓ వీడియోను సోషల్ మీడియాలో వైరల్ అవుతోంది.
“నేను చెప్పినట్లే జరిగింది. రేయ్ రామ్ గోపాల్ వర్మ.. సిగ్గులేనోడా సినిమాలో నా పేరు, వీడియోలు పెట్టానన్నావ్. ఇప్పుడేమైంది. నేను కోర్టులో నీకు ఇచ్చిన షాక్‌తో నా పేరుని, వీడియోలని, ఫొటోలను వాడుకోలేకపోయావ్. కేఏ పాల్ అని పేరు పెట్టావ్. కోర్టు అభ్యంతరం చెప్పడంతో ఏఏ పాల్ అని పెడతానన్నావ్. చివరికి జేజే జూలో అని ఏదో పెట్టావ్. ఇప్పటికైనా అర్థమైందా నాతో పెట్టుకుంటే ఏం జరుగుతుందో. ఎన్ని మోసాలు చేసినా వర్మ సక్సెస్ అవ్వలేదు. కోర్టులో జరిగిన సంభాషణ గురించి మా లాయర్ నాకు చెప్తే నాకు ఆశ్చర్యం కలిగింది. రామ్ గోపాల్ వర్మ ఎన్ని మోసాలు చేశాడో. ఆయనకు చీప్ పబ్లిసిటీ అని పేరు పెట్టారు. ఇలాంటి పనులు చేస్తున్నాడు కాబట్టే వర్మను ఆయన సొంత కుటుంబమే వదిలేసింది. ఆయనే చెప్పుకుంటాడు.. నాకు దేవుడు మంచి భార్యను ఇచ్చాడు. ఆమెకు మంచి భర్త లేడని. ఇప్పటికైనా మార్పు చెందు. నీ భార్యను, కూతురిని, అమ్మని సరిగ్గా చూస్కో. నేను కోటి రూపాయలు ఇవ్వలేదని నన్ను ఇందులోకి లాగావు. నాతో పెట్టుకున్నవాడు ఎవడైనా బాగుపడ్డాడా? నేను ఎవ్వడినీ వదిలిపెట్టను. నేను ట్రంప్ తప్పు చేసినా ఊరుకోను. భారత మాజీ రాష్ట్రపతి ఫొటోను మార్ఫ్ చేసి నీ ఫొటో పెట్టుకుంటావా? ఇంకోసారి పెట్టి చూడు.
నీ మీద రెండు ఎఫ్‌ఐఆర్లు ఉన్నాయి. నువ్వు చైనాలో ఉన్నా నేపాల్‌లో ఉన్నా ఎక్కడున్నా పోలీసులు నిన్ను పట్టుకుంటారు. ఇప్పుడు ఎటూ సినిమా ఫ్లాపైపోయిందిగా. పైగా ఎవరో నా సినిమాను ఆపుతున్నారు అంటూ వీడియో పెట్టి పంపిస్తావా? నీ ముఖం. కేసు పెట్టింది నేను. దమ్ముంటే చూపించుకో. నిన్ను ఆపడానికి మేమెందుకు డబ్బులిస్తాం. నిన్ను ఆపడం పెద్ద లెక్కా మాకు. నువ్వు మారు. లేకపోతే నాతో పెట్టుకుంటే నువ్వే కాదు నీతో పాటు ఉన్న నిర్మాతలు కూడా సర్వనాశనం అయిపోతారు. ఏసు ప్రభువు పేరును f** అంటావా? లోపల బాధున్నా కోపంగా మాట్లాడుతున్నాను. నువ్వు నా కాళ్ల మీద పడటం, నన్ను ప్రశంసించడం అన్నీ బాగున్నాయ్. కానీ జీసస్‌ని పట్టుకుని అంత ఘోరమైన పదజాలం వాడతావా? ఇప్పటికైనా మార్పు చెందు. దేవుళ్లను తిట్టడం ఆపు. సారీ చెప్పు. అప్పుడు జీసస్‌తో పాటు నేను కూడా నిన్ను క్షమిస్తాను. సినిమాలో కూడా జీసస్‌ పేరుతో కామెడీ చేశావంట. అందుకే సినిమా ఫ్లాప్ అయిపోయింది. రేపు నువ్వే యూట్యూబ్‌లో పెట్టుకుంటాడు. సరైన వాడు నిన్ను అడ్డుకోలేకపోవడంతో నీ పిచ్చి సినిమాలు విడుదలయ్యాయి. ఇక నుంచి అవేవీ కుదరవు. పైగా తెలంగాణ ముఖ్యమంత్రి కేసీఆర్‌తో సినిమా తీస్తాడంట. అసలు కేసీఆర్‌ నీతో సినిమా తీస్తాడా? నువ్వు ఆంధ్రప్రదేశ్ ముఖ్యమంత్రి జగన్‌పై ఇలాంటి సినిమా తీయగలవా? తీసి ఏపీలో అడుగుపెట్టగలవా? ఇంతకంటే నేను ఎక్కువ శపించానంటే ముక్కలు ముక్కలు అయిపోతావ్” అంటూ ఫైర్ అయ్యారు. మరి వర్మ ఎలా స్పందిస్తాడో చూడాలి.