అగ్రవర్ణ పేదలకు 10 శాతం రిజర్వేషన్లు కల్పించడంపై బీసీ సంక్షేమ సంఘం నేత ఆర్‌.కృష్ణయ్య మండిపడ్డారు. తెలంగాణ రాష్ట్రంలో 9 శాతం జనాభా ఉన్న అగ్రకులాలకు 10 శాతం రిజర్వేషన్లు ఇవ్వడంలో ఆంతర్యమేంటని నిలదీశారు. అగ్రకులాలకు రిజర్వేషన్ల బిల్లును వ్యతిరేకిస్తూ బీసీ సంక్షేమ సంఘం నేతృత్వంలో హైదరాబాద్‌లోని బషీర్‌బాగ్‌ రోడ్డులో అర్ధనగ్న ప్రదర్శన నిర్వహించారు. ఈ సందర్బంగా ఆర్‌.కృష్ణయ్య మాట్లాడుతూ.. అగ్రకులాల్లో వెనుకబడిన వారికి రిజర్వేషన్లు అడగని వాళ్లకు రిజర్వేషన్లు కల్పించడం ఏంటని ప్రశ్నించారు.
రాష్ట్రంలో ఇప్పటివరకు 30 మంది సీఎంలు అయితే ఒక్కరు కూడా బీసీ కులాలకు చెందిన వారు లేరన్నారు. దేశవ్యాప్తంగా అన్ని రాష్ట్రాల్లో గవర్నర్‌లు కూడా అగ్రకులాలకు చెందిన వారే ఉన్నారన్నారు. ఆఖరికి బ్యాంక్‌ చైర్మన్‌లు, ప్రభుత్వ రంగ చైర్మన్‌ల పదవుల్లో కూడా అగ్రకులాల వారే ఉన్నారని ధ్వజమెత్తారు. 80 శాతం కీలక పదవులను అనుభవిస్తున్న అగ్రకులాలకు చెందిన వారికి 10 శాతం రిజర్వేషన్లు కల్పించడంలో అర్థం ఉందా అని నిలదీశారు. బీసీలకు అన్యాయం చేస్తే సహించబోమని హెచ్చరించారు.
సుప్రీంకోర్టు తీర్పు కేంద్రానికి చెంపపెట్టు: సాధినేని యామిని