ప్రముఖ నటి, దర్శకురాలు, రచయిత్రి అయిన రేణు దేశాయ్.. పవన్ నుంచి విడిపోయిన తరువాత పుణే వెళ్లిపోయి మరాఠి సినిమా ఇండస్ట్రీలోకి అడుగుపెట్టారు. ప్రస్తుతం తెలుగు సినిమా ఇండస్ట్రీలోకి కూడా ఆమె రీఎంట్రీ ఇవ్వబోతున్నారు. రేణు దేశాయ్ కాస్ట్యూమ్ డిజైనర్ అని చాలా మందికి తెలిసిందే. రేణు ఒక మంచి కవియిత్రి. ఆమె ఇంగ్లిష్‌లో ఎన్నో కవితలు రాశారు. తాజాగా వరణుడిపై రాసిన ఒక కవితను రేణు ఇన్‌స్టాగ్రామ్‌లో పోస్ట్ చేశారు. అయితే, ఈ ఇంగ్లిష్ కవితను తెలుగులోకి అనువాదం కూడా చేశారు. ప్రముఖ సినీ గేయ రచయిత అనంత్ శ్రీరామ్‌తో తన ఇంగ్లిష్ కవితను తెలుగులోకి అనువాదం చేయించి ఇన్‌స్టాగ్రామ్‌లో పోస్ట్ చేశారు రేణు దేశాయ్. పోస్టులో ఇంగ్లిష్ కవితను.. కామెంట్స్‌లో తెలుగులో అనువాదం చేసిన కవితను పేర్కొన్నారు. ఈ కవితకు ఇప్పుడు మంచి స్పందన వస్తోంది. చాలా బాగుందంటూ ఇన్‌స్టాగ్రామ్ యూజర్లు కొనియాడుతున్నారు.
‘‘నా ఆత్మ సంచరిస్తోంది ఈ పెనుగాలుల్లో వివస్త్రగా, విపాదరక్షగా
తన ఉనికిని చూసి ఆశ్చర్యపోతూ ఇలా అంటోంది
నన్ను నా రక్తంలో పరిమితం చేయకు,
నా ప్రాణ వాహినిలా నాకు స్వేచ్ఛగా ప్రవహించాలనుంది
తెరలు తెరలుగా వచ్చి బలంగా తాకే వెచ్చటి గాలుల్లో ఈకలా
అలా అలా తేలిపోతుంది ఇప్పుడు నా హృదయం,
మెరుపు జాడని వెతుక్కుంటూ వెళ్లే జల్లెడ లాంటి మేఘంలా ఉంది
నన్ను ఆపకు – నా నెత్తుటిని ఉబకనివ్వు
నేను పరవళ్లు తొక్కాలి – నేను పైపైకెగరాలి
నేను కదలాలి – నేను కురవాలి
విత్తనమై నేలమ్మ కడుపులో మళ్లీ మొలకెత్తాలి
మళ్లీ వికసించడానికి – మళ్లీ విహరించడానికి’’