దక్షిణాఫ్రికాలోని పోర్ట్‌ఎలిజబెత్ ప్రాంతంలో అక్రమ కట్టడాలు ఎక్కువైపోయాయి. దీంతో వాటిని తొలగించాలని ప్రభుత్వం నిర్ణయించుకుంది. అయితే తమ ఇళ్లు ధ్వంసం చేయడానికి వీల్లేదంటూ ఆ ప్రాంత వాసులు ఎదురు తిరిగారు. ప్రభుత్వానికి వ్యతిరేకంగా ఆందోళనలు చేపట్టారు. వారిలో ఓ వ్యక్తి.. ఏడాది వయసున్న తన కూతుర్ని ఇంటిపైకి తీసికెళ్లి అక్కడి నుంచి ఒక్క ఉదుటున గాల్లోకి విసిరేశాడు. ఆమె గనుక నేలను తాకి ఉన్నట్లైతే అక్కడికక్కడే మరణించేదే. ఆమె అదృష్టం బాగుండి ఆందోళనకారులను అదుపు చేయడానికి వచ్చిన ఓ పోలీస్ అధికారి కంట పడిందా ఘటన. ఒక్క ఉదుటున ముందుకురికిన ఆయన.. నేల మీద పడాల్సిన పాపను గాల్లోనే అమాంతం అందుకున్నాడు. ఈ ఘటనలో అతనికి చిన్నపాటి గాయాలయ్యాయి. ఆ పాప తండ్రిని అదుపులోకి తీసుకున్న పోలీసులు అతనిపై హత్యా ప్రయత్నం కేసు నమోదు చేశారు. అయితే కేసు విచారణ జరిపిన న్యాయస్థానం ఈ కేసును కొట్టేసి, పాపను శారీరకంగా హింసించినట్లు మాత్రమే పేర్కొంది. ఆ తండ్రికి 5 వేల రాండ్స్(రూ.20 వేలపైగా) జరిమానా, ఏడాది జైలు శిక్ష విధిస్తున్నట్లు తెలిపింది.
ఏడాది పాపను ఇంటిపై నుంచి విసిరేసిన తండ్రి… ఎందుకంటే..!?
