భారీ మల్టీస్టారర్ చిత్రం ‘ఆర్ఆర్ఆర్’ దర్శకధీరుడు ఎస్ఎస్ రాజమౌళి దర్వకత్వంలో తెరకెక్కుతున్న విషయం తెలిసిందే. ప్రపంచ ఆడియన్స్ దృష్టిని తెలుగుతెర వైపు తిప్పిన ‘బాహుబలి’ సిరీస్ తర్వాత రాజమౌళి దర్శకత్వంలో రాబోతున్న మరో సినిమా కావడంతో ఈ సినిమాపై ఓ రేంజ్ అంచనాలు నెలకొన్నాయి. మరోవైపు చిత్రంలో యంగ్ స్టార్స్ ఎన్టీఆర్, రామ్ చరణ్‌ హీరోలుగా నటిస్తుండటంతో ఆ అంచనాలు ఆకాశాన్నంటాయి. ఈ చిత్రం సెట్స్‌పైకి వచ్చిన నాటినుంచే సెన్సేషన్ అవుతోంది. చారిత్రాక నేపథ్యం ఉన్న ఈ సినిమాలో హీరోయిన్స్‌గా ఆలియా భట్, బ్రిటీష్ నటి డైసీ ఎడ్గార్ జోన్స్‌ని ఎంపిక చేశారు జక్కన్న.
కొన్ని కారణాల వల్ల డైసీ ఈ ప్రాజెక్టు నుంచి తప్పుకోవడంతో, ప్రేక్షక లోకంలో ఆమె స్ధానంలో ఎవరిని తీసుకుంటారా అనే కుతూహలం ఎక్కువైంది. ఈ లోగా బాలీవుడ్ భామ శ్రద్ధా కపూర్‌ని డైసీ ప్లేస్‌లో తీసుకున్నారనే వార్త బాగా వైరల్ అయింది. ఈ విషయమై చిత్ర యూనిట్ నుంచి అధికారిక ప్రకటన రానప్పటికీ.. దానికి పొడగింపుగా మరో ఆసక్తికర వార్త ప్రస్తుతం తెగ హల్ చల్ చేస్తోంది. శ్రద్ధా కపూర్ కోసం రాజమౌళి స్ర్కిప్టులో కొన్ని మార్పులు చేర్పులు చేశారనేది ఆ వార్త సారాశం. ఈ వార్తల్లో నిజమెంతవరకుందో.. రాజమౌళినే స్పష్టం చేస్తే కానీ తెలియదు!