మొన్నటి కిలో రూ. 20 వరకూ పలికిన టమాటా ధర ఇప్పుడు దారుణంగా పడిపోయింది. వందల ఎకరాల్లో సాగుచేసిన పంట ఒకేసారి చేతికి రావడంతో ధర తగ్గింది. హోల్ సేల్ మార్కెట్లో కిలోకు రూపాయి కూడా పలకడం లేదు. హైదరాబాద్ బహిరంగ మార్కెట్లో రూ. 10 కి మూడు కిలోల టమాటా లభిస్తోంది.
సాధారణంగా హైదరాబాద్ కు వికారాబాద్ జిల్లాలోని పూడూరు, మోమిన్ పేట, నవాబుపేట వంటి ప్రాంతాల నుంచి టమాటా వస్తుంటుంది. ఈ ప్రాంతంలో 362 హెక్టార్లలో ఈ సంవత్సరం పంట సాగు చేయగా, రోజూ వేల సంఖ్యలో వస్తుంటాయి. 25 కిలోల టమాటా బాక్స్ రూ. 30కి అమ్మాల్సిన పరిస్థితి.
ప్రతి సంవత్సరం ఫిబ్రవరి, మార్చిలో టమాటాకు మంచి ధర పలుకుతుంది. ఈ సంవత్సరం కూడా అదే పరిస్థితి ఉంటుందని రైతులు భావించారు. మూడు నెలల క్రితం కిలో టమాటా రూ. 50ని కూడా దాటిపోయింది. కానీ క్రమంగా దిగుబడి పెరుగుతూ ఉంటే, ధర తగ్గింది. దీంతో కూలీల ఖర్చు కూడా రావడం లేదని టమాటా రైతులు వాపోతున్నారు.