ప్యాసింజర్ సర్వీసుల రద్దును పొడిగించిన రైల్వే శాఖ

దేశంలో కరోనా కలకలం కొనసాగుతుంది. ప్రస్తుతం కరోనా కేసుల సంఖ్య వేగంగా పెరుగుతోంది. ఈ నేపథ్యంలో రైల్వే శాఖ కీలక నిర్ణయం తీసుకుంది. సాధారణ మెయిల్, ఎక్స్‌ప్రెస్‌, సబర్బన్, ప్యాసింజర్ సర్వీసుల రద్దును సెప్టెంబర్ 30 వరకు పొడిగిస్తున్నట్లు ఉత్తర్వులు జారీచేసింది. గతంలో ప్యాసింజర్ రైళ్లపై విధించిన రద్దు ఆగష్టు 12తో ముగుస్తుండటంతో రైల్వేశాఖ మరోసారి ఆ తేదీని పొడిగిస్తూ ఉత్తర్వులు జారీ చేసింది. అంతే కాకుండా ప్రస్తుతం నడుస్తున్న 230 స్పెషల్ ట్రైన్స్ మాత్రం నడుస్తాయని తెలిపింది. రైళ్లలో ప్రయాణించేవారు తగిన జాగ్రత్తలు తీసుకోవాలని సూచించింది.