హైదరాబాద్‌లో జరిగిన రాజస్థాన్ రాయల్స్ vs సన్‌రైజర్స్ హైదరాబాద్ మ్యాచ్ లో హైదరాబాద్ జట్టు అద్భుత విజయం సాధించింది.199 పరుగుల భారీ విజయ లక్ష్యాన్ని మరో ఓవర్ మిగిలి ఉండగానే ఛేదించి పాయింట్ల ఖాతా తెరిచింది. ఈ మ్యాచ్‌లో టాస్ గెలిచి బ్యాటింగ్ ఎంచుకున్న రాజస్థాన్ రాయల్స్ నిర్ణీత 20 ఓవర్లలో 198 పరుగులు చేసింది. కెప్టెన్ అజింక్య రహానే, సంజు శాంసన్‌లు చెలరేగిపోయారు. రహానే 49 బంతుల్లో 4 ఫోర్లు, మూడు సిక్సర్లతో 70 పరుగులు చేసి అవుటవగా, శాంసన్ 55 బంతుల్లో 10 ఫోర్లు, నాలుగు సిక్సర్లతో 102 పరుగులు చేశాడు. ఐపీఎల్‌లో అతడికి ఇది రెండో సెంచరీ కాగా, ఈ సీజన్‌లో నమోదైన తొలి సెంచరీ కూడా ఇదే.
అనంతరం 199 పరుగుల భారీ విజయ లక్ష్యంతో బరిలోకి దిగిన హైదరాబాద్ సొంత మైదానంలో చెలరేగి ఆడింది. డేవిడ్ వార్నర్ మరోమారు అద్భుతంగా ఆడాడు. 37 బంతుల్లో 9 ఫోర్లు, 2 సిక్సర్లతో 69 పరుగులు చేయగా, బెయిర్‌స్టో 28 బంతుల్లో 6 ఫోర్లు, సిక్సర్‌తో 45 పరుగులు చేశాడు. విజయ్ శంకర్ కూడా మెరుపులు మెరిపించాడు. 15 బంతుల్లో ఫోర్, మూడు సిక్సర్లతో 35 పరుగులు చేశాడు. ఫలితంగా మరో ఓవర్ మిగిలి ఉండగానే హైదరాబాద్ ఐదు వికెట్లు మాత్రమే కోల్పోయి విజయం సాధించింది. బౌలింగ్‌లో ఓ వికెట్ తీసి, బ్యాటింగ్‌లో 8 బంతుల్లో ఫోర్, సిక్సర్‌తో 15 పరుగులు చేసిన రషీద్ ఖాన్‌కు ప్లేయర్ ఆఫ్ ద మ్యాచ్ అవార్డు దక్కింది.
నేడు మ్యాచ్ లో పంజాబ్ vs ముంబై మరియు కలకత్తా vs ఢిల్లీ ఆడనున్నాయి.