గుండెల్లో నిత్యం ఎన్నో బాధల గునపాలు దిగుతున్నా
పెదవులపై చిరునవ్వులను వెలిగిస్తూనే ఉంటాను
బాధలు జీవితాన్ని రాపిడిపట్టే అసలైన వజ్రకవచాలు
కళ్ళల్లో ఎన్నో కన్నీటి సముద్రాలు పొంగిపొర్లుతున్నా
ముఖంలో నిట్టూర్పులను కనుమరుగు చేస్తుంటాను
వేదనలు జీవనతీరాన్ని చేర్చే అనంతమైన కెరటాలు
మదిసాగరంలో ఆటుపోట్ల అలజడులు రేగుతున్నా
మనసులో బాధఛాయలను కప్పిపెడుతూనే ఉంటాను
జీవితంలోని కష్టాలు కనురెప్పల్లో దాగిన కడగండ్లు
వసంతంలాంటి జీవితంలో శిశిరగ్రీష్మాలు ప్రవేశిస్తున్నా
హేమంతశరత్ రుతువుల్లా వెన్నెలై వెలుగుతుంటాను
ఆరురుతువులు జీవితంలో వచ్చే వెన్నెలవడగాడ్పులు
కలికాలపు సుడిగుండంలో క్షణాలన్నీ కొట్టుకుపోతున్నా
రోజూ జీవితాన్ని ఎండమావిలా గడుపుతూ ఉంటాను
కష్టాలు సుఖాలు కాలానికి పూచిన ఎండిపోని పూలు
– డాక్టర్ భీంపల్లి శ్రీకాంత్
జయలలిత పాత్రలో నటించడానికి నేనే పర్ఫెక్ట్ : నిత్యామీనన్