సీనియర్ బాలీవుడ్, మరాఠీ నటి ఆశాలత వబ్‌గాంకర్ కరోనా కాటుతో కన్నుమూశారు. ఆమె వయసు 83 సంవత్సరాలు. గత కొన్ని రోజులుగా కరోనాతో బాధపడుతున్న ఆశాలత ఆరోగ్య పరిస్థితి విషమించడంతో సతారాలోని ప్రతిభ హాస్పిటల్‌లో చేర్పించగా.. చికిత్స పొందుతూనే ఆమె తుది శ్వాస విడిచారు. మరాఠీ రంగస్థల నటిగా ఫేమస్ అయిన ఆశాలత వబ్‌గాంకర్ ముందుగా కొంకణీ సినిమాలో నటించింది. ఆ తర్వాత మరాఠీ చిత్ర పరిశ్రమలో ప్రవేశించి క్యారెక్టర్ ఆర్టిస్ట్‌గా మెప్పించింది. కొంకొణి, హిందీ, మరాఠీ సినిమాల్లో కలిపి దాదాపు 100కు పైగా సినిమాల్లో ఆమె నటించింది. ఆ తర్వాత మరాఠీ ప్రసారమయ్యే పలు టీవీ సీరియల్లో అత్త, అమ్మ పాత్రల్లో మెప్పించింది. ఆశాలత మరణవార్త తెలిసి సినీ ప్రముఖులు సంతాపం వ్యక్తం చేస్తున్నారు. ఇక ఈ ఏడాది సినీ ఇండస్ట్రీని వరుస విషాదాలు వెంటాడుతున్నాయి. బాలీవుడ్, టాలీవుడ్, కోలీవుడ్ సినీ పరిశ్రమకు చెందిన నటీనటుల వరుస మరణాలు కలకలం సృష్టిస్తున్నాయి.
కరోనాతో బాలీవుడ్ సీనియర్ నటి కన్నుమూత
