అమెరికా అధ్యక్షుడు డొనాల్డ్ ట్రంప్ ఐఫోన్ కొత్త డిజైన్‌పై తీవ్ర అసంతృప్తి వ్యక్తం చేశారు. పాత డిజైన్‌లో ఉండే హోం బటనే బాగుండేదని, స్వైప్ కొంచెం ఇబ్బందిగా ఉందని పేర్కొంటూ యాపిల్ సీఈవో టిమ్ కుక్‌కు ట్వీట్ చేశారు. కొత్త మోడల్‌ను ఉపయోగించడంలో ఎదురవుతున్నఇబ్బందిని ఏకరువు పెట్టారు. అయితే, ట్రంప్ ఆగ్రహానికి కారణం ఏమిటన్నది తెలియరాలేదు. రెండేళ్ల క్రితం తీసుకొచ్చిన ఐఫోన్ 10లో యాపిల్ చిన్న మార్పులు చేసింది. కొత్త మోడళ్లలో హోం బటన్‌ను తొలగించి అప్‌గ్రేడ్ చేసింది. తాజాగా తీసుకొచ్చిన ఐఫోన్ 11, ఐఫోన్ 11 మ్యాక్స్ ప్రో ఫోన్లలోనూ హోం బటన్లు తీసేసింది.
ఇప్పటివరకు ప్రభుత్వం సమకూర్చిన ఐఫోన్‌నే ట్రంప్ వాడుతున్నారు. ఇది పాత మోడల్ కావడంతో ప్రభుత్వం దానిని అప్‌గ్రేడ్ చేసి కొత్త మోడల్‌ను ట్రంప్ చేతిలో పెట్టింది. ఇప్పుడందులో హోం బటన్ లేకపోయే సరికి ట్రంప్‌కు చిర్రెత్తుకొచ్చింది. కొత్త ఫోన్లలో హోం స్క్రీన్‌కు రావాలంటే ప్రతిసారీ స్క్రీన్‌ను స్వైప్ చేసుకోవాల్సి వస్తోంది. దీంతో సాధారణ వినియోగదారులు కూడా కొంత ఇబ్బంది పడుతున్నారు. ట్రంప్‌కు కూడా ఇదే అనుభవం ఎదురవుతుండడంతో టిమ్‌కుక్‌కు ట్వీట్ చేశారు. హోం బటన్ ఉన్నప్పుడే ఐఫోన్ వాడడం సులభంగా ఉండేదని పేర్కొన్నారు. కాగా, ట్రంప్ ఈ ట్వీట్ చేసిన తర్వాత గతంలో యాపిల్‌ను ఉద్దేశించి ట్రంప్ చేసిన ట్వీట్లు ఇప్పుడు వైరల్ అవుతున్నాయి. యాపిల్ కూడా శాంసంగ్‌లా పెద్దపెద్ద స్క్రీన్లు ఉన్న ఫోన్లు విడుదల చేయాలని, అందులో హోం బటన్‌ను తొలగించాలని పేర్కొన్నారు. ఇప్పుడు అందుకు విరుద్ధంగా ట్వీట్ చేయడంపై నెటిజన్లు విమర్శిస్తున్నారు.