నకిలీ జర్నలిస్టుల బెడదకు తెలంగాణ ప్రభుత్వం కళ్లెం వేసింది. ఇకపై ప్రభుత్వ గుర్తింపు పొందిన అక్రిడిటేషన్ కార్డులు ఉన్న జర్నలిస్టులు మాత్రమే వాహనాలపై ‘ప్రెస్’ స్టిక్కర్లు వాడాలని స్పష్టం చేసింది.
అనధికారికంగా స్టిక్కర్లు వాడితే భారీ జరిమానాతో పాటు వాహనం సీజ్ చేసే అవకాశం ఉందని హెచ్చరించింది.
మీడియా ముసుగులో చెలామణి అవుతున్న నకిలీ జర్నలిస్టులకు కళ్లెం వేసేందుకు తెలంగాణ ప్రభుత్వం సంచలన నిర్ణయం తీసుకుంది.
ఇకపై రాష్ట్ర ప్రభుత్వ గుర్తింపు పొందిన అక్రిడిటేషన్ కార్డులు ఉన్న జర్నలిస్టులు మాత్రమే తమ వాహనాలపై ‘Press’ అని స్టిక్కర్లు వేసుకోవాలని స్పష్టం చేస్తూ సమాచార, పౌర సంబంధాల శాఖ (I&PR) అధికారిక ఉత్తర్వులు జారీ చేసింది.
సెంట్రల్ మోటార్ వెహికల్ చట్టం 1989 ప్రకారం.. అనధికారికంగా వాహనాలపై లేదా రిజిస్ట్రేషన్ నెంబర్ ప్లేట్లపై Press, Police, Govt వంటి పదాలను వాడటం చట్టరీత్యా నేరం.
అక్రిడిటేషన్ లేని వారు ఈ స్టిక్కర్లను వాడితే ట్రాఫిక్ నిబంధనల ఉల్లంఘన కింద పరిగణించి భారీ జరిమానాతో పాటు, అవసరమైతే వాహనాన్ని సీజ్ చేసే అధికారం కూడా రవాణా శాఖకు ఉందని అధికారులు వెల్లడించారు.
ఈ నిబంధనలు రాష్ట్రవ్యాప్తంగా కఠినంగా అమలు చేయాలని సమాచార శాఖ కమిషనర్ జిల్లా పౌర సంబంధాల అధికారులకు స్పష్టమైన ఆదేశాలు జారీ చేశారు.