బిగ్‌బాస్ విన్నర్ ఇంట్లో విషాదం

బిగ్‌బాస్ -9 (హిందీ) విజేత ప్రిన్స్ నరూలా ఇంట్లో విషాదం చోటు చేసుకుంది. కెనడాలో ఉంటున్న ప్రిన్స్ సోదరుడు రూపేష్ నరూలా అనుకోని ప్రమాదంలో మరణించారు. రూపేష్ నరూలా స్కార్‌బోర్గ్‌లోని పార్క్ బీచ్‌లో కెనడా డే ఉత్సవాల్లో పాల్గొన్నారు. ఈ సమయంలో వేగంగా వచ్చిన సముద్రపు అలలో చిక్కుకున్నారు. అతనికి ఈత రాకపోవడంతో సముద్రంలోకి కొట్టుకుపోయారు. కాగా రూపేష్‌కు మూడు నెలల క్రితమే వివాహం జరిగింది. ఈ దుర్ఘటన నేపధ్యంలో ప్రిన్స్, అతని భార్య యువికలు రూపేష్ అంత్యక్రియల్లో పాల్గొనేందుకు కెనడా బయలు దేరారు. కాగా ప్రిన్స్ ‘నచ్ బలియే’ షూటింగ్‌లో ఉండగా ఈ వార్త తెలియడంతో ఆయన సెట్‌ లోనే భావోద్వేగానికి లోనయ్యారు. నెటిజన్లు రూపేష్ కుటుంబ సభ్యులకు సంతాపం తెలియజేస్తున్నారు.