ప్రముఖ క్యారెక్టర్ ఆర్టిస్టు సనా తెలుగు ప్రేక్షకులకు సుపరిచితమే. తెలుగు, తమిళంలో కలిపి దాదాపు 600 సినిమాల్లో నటించారామె. సినిమాల్లోనే కాకుండా టీవీ సీరియళ్లలోనూ నటించి బుల్లితెర ప్రేక్షకులను మెప్పించారు. మరోవైపు టీవీ నటి సమీరా కూడా తెలుగు ప్రేక్షకులకు తెలిసిన మొహమే. సీరియల్స్, డ్యాన్స్ షోల ద్వారా తెలుగు ఆడియన్స్‌కు ఆమె దగ్గరయ్యారు. ప్రస్తుతం వీరిద్దరూ అత్తాకోడళ్లు అయ్యారు. సనా కుమారుడు అన్వర్… సమీరాను వివాహమాడారు. గత నాలుగున్నరేళ్లుగా వీరిద్దరూ ప్రేమలో ఉన్నారు. ఇప్పుడు వివాహ బంధంతో ఒక్కటయ్యారు. వీరి వివాహం పెద్దగా హడావుడి లేకుండా కుటుంబ, మత పెద్దల మధ్య సోమవారం రాత్రి జరిగింది. ఈ మేరకు సన, ఆమె భర్త సయ్యద్ సదుద్దీన్ మీడియాకు వివరాలను వెల్లడించారు. “మా అబ్బాయి సయ్యద్ అన్వర్ వివాహం సమీరా షెరీఫ్‌తో పెద్దల సమక్షంలో వివాహం జరిగింది. మా అబ్బాయి పలు తమిళ సీరియల్స్‌లో హీరోగానే కాకుండా నిర్మాతగా కూడా చాలా ఫేమస్‌. అలాగే మా కోడలు సమీరా షెరీఫ్‌ కూడా తెలుగు, తమిళ టీవీ రంగాల్లో బుల్లితెరపై సంచలనం సృష్టించిన అనేక సీరియల్స్‌లో హీరోయిన్‌గా చేసింది. వీరిద్దరి ప్రేమకు గుర్తుగా ఇన్‌స్టాలో ‘అన్విరా’ హ్యాండిల్‌తో పోస్టులు పెడుతుంటారు. ఈ పోస్ట్‌లు ఇన్‌స్టాగ్రామ్‌లో చాలా ఫేమస్‌. సోమవారం రాత్రి వీరి వివాహం కుటుంబ సభ్యుల సమక్షంలో ప్రశాంతంగా జరిగింది. ఎంతో గ్రాండ్‌గా భారీ ఎత్తున చేసుకోవచ్చు.. కానీ వారిద్దరికీ ఏ హడావుడి లేకుండా చేసుకోవటమే ఇష్టం. కారణం ఇద్దరూ కలిసి కొంతమంది పేద విద్యార్థులను దత్తత తీసుకొని వారి చదువుకయ్యే ఖర్చులకు సహాయపడాలనుకుంటున్నారు. వారిద్దరి నిఖా జరిగిందని ప్రపంచానికి తెలియజేయాలనే ఉద్దేశంతో మేం ఈ విషయాన్ని పత్రికా ముఖంగా తెలియజేశాం” అని చెప్పారు.
ప్రముఖ నటి సనా కొడుకుతో టీవీ నటి సమీరా ప్రేమ వివాహం
