విధి నిర్వహణలో ఉద్యోగులు ఎంత కష్టపడుతున్న బాసులను మెప్పించడం అంత సులభమైన పనికాదు. దీంతో చాలామంది తమ బాస్లు తమను తిట్టకుండా ఉంటే చాలని ఉద్యోగులు భావిస్తుంటారు.అయితే చైనాలోని ఆ సంస్థలో మాత్రం కష్టపడి పనిచేసే ఉద్యోగులను నెత్తిన పెట్టుకుని చూసుకుంటారు. ఆ సంస్థలో తమ కింది ఉద్యోగులకు బాసులు ఘన సత్కారం చేశారు. వారి శ్రమను గుర్తించి షూలు విప్పి కాళ్లు కడిగారు. సంస్థ అభివృద్ధికి చేస్తున్నా సాయానికి గాను ఉద్యోగులందరికీ చేతులు జోడించి నమస్కరించారు. ఈ కార్యక్రమం చైనాలోని జినాన్ ప్రాంతంలోని ఓ సంస్థలో నవంబరు 2న నిర్వహించారు.
ఈ కార్యక్రమంలో ఆ సంస్థకు చెందిన ఇద్దరు సినీయర్ మహిళా అధికారులు.. బాగా పనిచేసిన తమ కింది ఉద్యోగులను వేదిక కూర్చొబెట్టారు. అనంతరం వారి కాళ్లు కడిగారు. సోషల్ మీడియాలో వైరల్ అవుతున్న ఈ వీడియోపై ఆన్‌లైన్‌లో పెద్ద చర్చే జరుగుతోంది. తమ కింద ఉద్యోగుల ముందు మోకరిల్లి.. వాళ్ల కాళ్లు కడగడం కంటే ఆ ఉద్యోగుల జీతాలను పెంచినట్లయితే మరింత ప్రోత్సాహకరంగా ఉండేదని నెటిజనులు కామెంట్లు చేస్తున్నారు. మరికొందరు మాత్రం ఇలాంటి బాసులు మాకెందుకు లేరని వాపోతున్నారు.