ఏపీ డిప్యూటీ సీఎం, జనసేన అధినేత పవన్ కల్యాణ్‌పై ఓ కళాకారుడు తన అభిమానాన్ని, గ్రామ ప్రజల కృతజ్ఞతను వినూత్న రీతిలో చాటుకున్నారు.
అక్షరాలతోనే పవన్ చిత్రాన్ని గీసి అందరినీ ఆకట్టుకున్నారు. నంద్యాల జిల్లా నందికొట్కూరు మండలానికి చెందిన ఓ చిత్రకారుడు, కొణిదెల గ్రామస్థులు కలిసి ఈ అద్భుతమైన చిత్రపటాన్ని రూపొందించారు.
నందికొట్కూరు మండలంలోని కొణిదెల గ్రామ అభివృద్ధి కోసం డిప్యూటీ సీఎం పవన్ తన సొంత నిధుల నుంచి రూ. 50 లక్షలు కేటాయించారు.
ఇచ్చిన మాట ప్రకారం నిధులు మంజూరు చేయడంతో గ్రామస్థుల ఆనందానికి అవధుల్లేకుండా పోయాయి. ఈ నిధులతో చేపట్టనున్న అభివృద్ధి పనులకు గురువారం భూమి పూజ కార్యక్రమం నిర్వహించారు.
ఈ కార్యక్రమానికి ఎంపీ డాక్టర్ శబరి, స్థానిక ఎమ్మెల్యే గిత్తా జయసూర్య, జిల్లా కలెక్టర్ రాజకుమారి ముఖ్య అతిథులుగా హాజరై పనులను లాంఛనంగా ప్రారంభించారు.
ఈ ప్రత్యేక సందర్భాన్ని పురస్కరించుకుని గ్రామస్థుల తరఫున ఓ చిత్రకారుడు తన కళానైపుణ్యాన్ని ప్రదర్శించారు.
“ఇచ్చిన మాట నిలబెట్టుకున్న కొణిదెల లీడరుకు హృదయ పూర్వక కృతజ్ఞతలు” అనే వ్యాక్యంలోని అక్షరాలను ఉపయోగించి పవన్ కల్యాణ్ ముఖచిత్రాన్ని అద్భుతంగా గీశారు.
తమ గ్రామ అభివృద్ధికి సాయం చేసిన నాయకుడికి ఈ అక్షర చిత్రం ద్వారా తమ ప్రేమను, గౌరవాన్ని తెలియజేశారు. ఈ వినూత్న ఆలోచన అక్కడున్న వారిని ఎంతగానో ఆకట్టుకుంది. ప్రస్తుతం ఈ అక్షర చిత్రం సోషల్ మీడియాలో పలువురి ప్రశంసలు అందుకుంటోంది.