ప్రేమ గుడ్డిది. ప్రేమలో పడ్డవారు నిద్రాహారాలు మాని, ప్రేమించిన అమ్మాయి కోసం పడరాని పాట్లుపడుతారు. ప్రాణాలను కూడా లెక్కచేయకుండా ఎంతకైనా తెగిస్తుంటారు కొందరు యువకులు. ప్రేమ కొందరికి ప్రాణాలు పోస్తుంది. ఆ ప్రేమే కొందరి ప్రాణాలు తీస్తుంది. తన ప్రియురాలు తనతో మాట్లాడడం లేదని ఓ ప్రేమికుడు తన మణికట్టును కోసుకుని.. రక్తాన్ని బీర్‌బాటిల్‌లో పట్టి ఆమెకు బహుమానంగా పంపించాడు. ఈ సంఘటన తమిళనాడులోని నంగనల్లూరులో బుధవారం చోటు చేసుకోగా ఆలస్యంగా వెలుగు చూసింది.
నంగనల్లూరుకు చెందిన కుమారీశ పండియన్ గత కొన్ని సంవత్సరాల నుంచి ఓ అమ్మాయిని ప్రేమిస్తున్నాడు. అయితే గత కొద్ది వారాల నుంచి ఆ యువతి.. పండియన్‌తో మాట్లాడడం మానేసింది. సోషల్ మీడియాలో కూడా అతని కాంటాక్ట్‌ను బ్లాక్ చేసింది. దీంతో ఆ ప్రేమికుడు తీవ్ర మనోవేదనకు గురయ్యాడు. తీవ్ర ఒత్తిడికి లోనైన పండియన్.. మంగళవారం తన స్నేహితుడైన ముత్తును కలుసుకుని మద్యం సేవిస్తూ విషయం చెప్పాడు.
మద్యం మత్తులో ఉన్న పండియన్.. బీర్ బాటిల్‌ను పగులగొట్టి తన మణికట్టును కోసుకున్నాడు. ఆ తర్వాత రక్తాన్ని మరో బీర్ బాటిల్‌లో పట్టాడు. ఈ రక్తాన్ని తన ప్రియురాలికి బహుమానంగా ఇవ్వాలని ముత్తును పండియన్ కోరాడు. ఇక తీవ్ర రక్తస్రావమైన పండియన్‌ను ముత్తు ఆస్పత్రికి తరలించాడు. బుధవారం తెల్లవారుజామున ఆస్పత్రిలో చికిత్స పొందుతూ పండియన్ కన్నుమూశాడు. ఈ ఘటనపై కేసు నమోదు చేసుకున్న పోలీసులు దర్యాప్తు చేపట్టారు.