నేను స్లెడ్జింగ్ చేసినా సచిన్ ఎప్పుడూ స్పందించలేదు : పాక్ కీపర్ రషీద్ లతీఫ్

భారత దిగ్గజ క్రికెటర్ సచిన్ టెండూల్కర్ మైదానంలో ప్రత్యర్థి ఆటగాళ్లు స్లెడ్జింగ్ చేసినా మౌనంగా ఉండి బ్యాట్‌తో వారికి సమాధానం చెప్పేవాడు. ఈ విషయాన్ని తాజాగా పాకిస్థాన్ మాజీ వికెట్ కీపర్ రషీద్ లతీఫ్ మరోసారి గుర్తుచేసుకున్నాడు. అప్పట్లో తాను వికెట్ల వెనుక నుంచి స్లెడ్జింగ్ చేసినా.. సచిన్ ఎప్పుడూ నోరు జారలేదని చెప్పుకొచ్చిన లతీఫ్.. ముసిముసిగా నవ్వుకునేవాడని వెల్లడించాడు. ‘‘చాలా మంది అగ్రశ్రేణి బ్యాట్స్‌మెన్‌లు బ్యాటింగ్ చేస్తున్న సమయంలో నేను కీపింగ్ చేశాను. కానీ.. సచిన్ టెండూల్కర్ బ్యాటింగ్ చేసే టైమ్‌లో మాత్రం.. అతడ్ని ఔట్ చేయాలనే ఆలోచనే నాకు వచ్చేది కాదు. ఎందుకంటే.. సచిన్ బ్యాటింగ్‌‌ని వికెట్ల వెనుక నుంచి నేను బాగా ఎంజాయ్ చేసేవాడ్ని. బ్రయాన్ లారా, రికీ పాంటింగ్, కలిస్ తదితరుల్ని అప్పట్లో ఔట్ చేయాలనే ఉద్దేశంతో కొద్దిగా స్లెడ్జింగ్ చేసేవాడ్ని. కానీ.. సచిన్ వ్యక్తిత్వం వేరు. నేను నోరు జారినా సరే.. అతను మాత్రం ఎప్పుడూ స్పందించలేదు. నా మాటల్ని విని ముసిముసిగా నవ్వుకునేవాడు’’ అని లతీఫ్ వెల్లడించాడు. పాకిస్థాన్ తరఫున 1992 నుంచి 2003 వరకూ రషీద్ లతీఫ్ మ్యాచ్‌లు ఆడాడు. ఈ క్రమంలో 37 టెస్టులు, 166 వన్డేలకి కీపింగ్ చేసిన లతీఫ్.. అప్పట్లో వికెట్ల వెనుక నుంచి స్లెడ్జింగ్‌తో బ్యాట్స్‌మెన్‌ల ఏకాగ్రతని దెబ్బతీసేవాడు. అయితే.. సచిన్ అతని ఉచ్చులో ఎప్పుడూ పడినట్లు కనిపించలేదు.