తెలంగాణ ముఖ్యమంత్రి రేవంత్ రెడ్డి నేడు సాయంత్ర బీహార్ వెళ్ళనున్నారు. రేపు పాట్నాలో జరగనున్న కాంగ్రెస్ వర్కింగ్ కమిటీ (సీడబ్ల్యూసీ) సమావేశానికి ఆయన హాజరు కానున్నారు.
ఆ తర్వాత ఈ నెల 25న తమిళనాడులో ఆ రాష్ట్ర ముఖ్యమంత్రి స్టాలిన్ ‘నీట్’పై నిర్వహించబోయే సమావేశం కోసం చెన్నై వెళతారు.
మేడారంలో సమ్మక్క-సారలమ్మ అమ్మవార్లను దర్శించుకున్న ముఖ్యమంత్రి
ముఖ్యమంత్రి రేవంత్ రెడ్డి ఈరోజు ములుగు జిల్లా మేడారం సమ్మక్క-సారలమ్మ అమ్మవార్ల గద్దెలను దర్శించుకున్నారు.
అనంతరం ఆలయ అభివృద్ధిపై అధికారులతో సమీక్ష నిర్వహించారు. అనంతరం ఏర్పాటు చేసిన బహిరంగ సభలో ఆయన మాట్లాడుతూ, ఆదివాసీల సంక్షేమం కోసం తమ ప్రభుత్వం కృషి చేస్తోందని అన్నారు.
మేడారం జాతరకు జాతీయ హోదా ఇవ్వాలని, ఈ మేరకు నిధులు మంజూరు చేయాలని ఆయన కేంద్ర ప్రభుత్వాన్ని డిమాండ్ చేశారు.
అమ్మవార్ల ఆశీస్సులతో 2023 ఫిబ్రవరి 6న ఇక్కడి నుంచి తాను పాదయాత్ర ప్రారంభించానని గుర్తు చేసుకున్నారు. నాటి పాలకులు సమ్మక్క-సారలమ్మ అభివృద్ధిపై వివక్ష చూపారని ఆరోపించారు.
తమ ప్రభుత్వం ఆలయం అభివృద్ధి కోసం కోట్లాది రూపాయలు మంజూరు చేసేందుకు సిద్ధంగా ఉందని హామీ ఇచ్చారు. సమ్మక్క-సారలమ్మ అమ్మవార్ల ఆశీర్వాదంతో ప్రజా ప్రభుత్వం ఏర్పడిందని అన్నారు.