ఆంధ్రప్రదేశ్ లో వైఎస్సార్ కాంగ్రెస్ పార్టీ అధికారంలోకి వచ్చినప్పటి నుంచి రాష్ట్ర వ్యాప్తంగా అక్కడక్కడ ఏదో విషయంలో ఇరు వర్గాల మధ్య గొడవలు జరుగుతూనే ఉన్నాయి. ఈ నేపథ్యంలో ప్రకాశం జిల్లాలో వైసీపీ నేతలు రోడ్డును తవ్వి ధ్వంసం చేశారు. ఎన్నికల్లో తమ పార్టీకి ఓటు వేయలేదన్న ఒకే ఒక్క కారణంతో ఈ దౌర్జన్యానికి పాల్పడ్డారు. స్థానికులు అడ్డుకునే ప్రయత్నం చేయగా వారిపై కూడా దాడికి దిగారు.
స్థానికంగా ఉప్పలపాడులోని ముస్లిం కాలనీలో టీడీపీ ప్రభుత్వ హయాంలో రూ. 5 లక్షల నిధులతో సీసీ రోడ్ల నిర్మాణం చేపట్టారు. సరిగ్గా 10 నెలల క్రితమే ఈ నిర్మాణం పూర్తయింది. ఇటీవల ఎన్నికల్లో ఆ కాలనీ వాసులు కనిగిరి టీడీపీ అభ్యర్థి ఉగ్రనర్సింహరెడ్డికి మద్దతు పలికారు. దీనిపై ఆగ్రహించిన వైసీపీ నేతలు ఆ రోడ్డును తవ్వి ధ్వంసం చేశారు. అడ్డుకోడానికి వచ్చినవారిపై కూడా దురుసుగా ప్రవర్తించారు. చేతనైంది చేసుకోండంటూ బెదిరింపులకు కూడా పాల్పడ్డారని స్థానికులు ఆవేదన వ్యక్తం చేశారు. ఈ ఘటనపై స్థానికులు పోలీసులకు ఫిర్యాదు చేశారు.