“ఆర్ఆర్ఆర్” విడుదల వాయిదా ?

దర్శకధీరుడు రాజమౌళి దర్శకత్వంలో భారీ బ‌డ్జెట్‌తో యంగ్ టైగ‌ర్ ఎన్టీఆర్‌, మెగా పవర్ స్టార్ రామ్‌చ‌ర‌ణ్ కాంబినేష‌న్‌లో రూపొందుతున్న టాలీవుడ్ మోస్ట్ ప్రెస్టీయ‌స్ ప్రాజెక్ట్ “ఆర్ఆర్ఆర్”. హై టెక్నిక‌ల్ వేల్యూస్ తెరకెక్కుతున్న చిత్ర‌మిది. అలియా భ‌ట్‌, సముద్రఖని, అజ‌య్ దేవ‌గణ్ కీల‌క పాత్ర‌ల‌లో క‌నిపించ‌నున్నారు. ఈ చిత్రంలో ఎన్టీఆర్ కొమ‌రం భీమ పాత్ర‌లో, రామ్‌చ‌ర‌ణ్ అల్లూరి సీతారామరాజుగా న‌టిస్తున్నారు. డీవీవీ ఎంట‌ర్‌టైన్‌మెంట్ బేన‌ర్‌పై దాన‌య్య చిత్రాన్ని నిర్మిస్తున్నారు. రెండు నిజ పాత్ర‌ల క‌ల్పిత క‌థాంశమే ఈ చిత్ర‌మని ఇది వ‌ర‌కే రాజ‌మౌళి తెలియ‌జేశారు. డీవీవీ ఎంట‌ర్‌టైన్‌మెంట్స్ బేన‌ర్‌పై దాన‌య్య నిర్మిస్తున్న ఈ చిత్రాన్ని జూలై 30, 2020న విడుద‌ల చేస్తామని ప్రకటించారు. అయితే పలు కారణాల వల్ల ఈ సినిమా షూటింగ్ ఆలస్యమవుతోందట. దీంతో సినిమా విడుదల తేదీని వాయిదా వేయాలని చిత్ర యూనిట్ భావిస్తున్నట్టు సమాచారం. ముందుగా అనుకున్నట్టు జులై 30న కాకుండా దసరా సమయానికి, లేదా 2021 సంక్రాంతికి విడుదల చేయాలని అనుకుంటున్నారట. `ఆర్ఆర్ఆర్` తెలుగుతోపాటు ఇతర భారతీయ భాషల్లో కూడా భారీగా విడుదలవుతుంది. కాబట్టి, అన్ని భాషల్లోనూ మంచి రిలీజ్ డేట్ చూసుకుని విడుదల చేస్తారట. బాలీవుడ్ భారీ సినిమాలతో పోటీ పడకుండా విడుదల చేయాలని ప్లాన్ చేస్తున్నారట. ఇటీవలే బల్గేరియాలో ఓ షెడ్యూల్ పూర్తయింది. తర్వాతి షెడ్యూల్ హైదరాబాద్‌లో జరగనున్నట్లు తెలిసింది. ఈ సినిమాకు ఏ టైటిల్‌ను ఖరారు చేయబోతున్నారనే విషయం అందరిలో ఉత్సుకతను రేకెత్తిస్తున్నది. ఆర్.ఆర్.ఆర్ సంక్షిప్త నామాన్ని విస్తరిస్తూ అనేక టైటిల్స్ ప్రచారంలోకి వస్తున్నాయి.