ఇండియాలో ఓ రోజు ముందుగానే “స్పైడ‌ర్ మ్యాన్: ఫార్ ఫ్ర‌మ్ హోం”

మార్వెల్ సంస్థ నుండి విడుదలయ్యే చిత్రాలకు ప్రపంచవ్యాప్తంగా మంచి గుర్తింపు ఉన్న విషయం విదితమే. ఇటీవల ఈ సంస్థ నుంచి విడుదలైన “అవెంజర్స్” సినిమా ప్రపంచవ్యాప్తంగా భారీ వసూళ్లను కొల్లగొట్టడమే కాకుండా పలు రికార్డులను తిరగరాసింది. ఇక ఇప్పుడు ఇదే సంస్థ నుంచి సూపర్ హీరో చిత్రం “స్పైడ‌ర్ మ్యాన్ : ఫార్ ఫ్ర‌మ్ హోం” విడుదలకు సిద్ధ‌మ‌వుతోంది. “స్పైడ‌ర్ మ్యాన్ : ఫార్ ఫ్ర‌మ్ హోం” చిత్రాన్ని ఓ రోజు ముందుగానే సోనీ పిక్చ‌ర్స్ ఎంట‌ర్‌టైన్‌మెంట్ ఇండియా విడుద‌ల చేస్తుంది. ఇంగ్లీష్, హిందీ, తెలుగు, త‌మిళ భాష‌ల్లో జూలై 4న ఈ సినిమా భారీ స్థాయిలో విడుదల చేస్తున్నారు. ఈ సంద‌ర్భంగా సోనీ పిక్చ‌ర్స్ ఎంట‌ర్‌టైన్‌మెంట్ ఇండియా మేనేజింగ్ డైరెక్ట‌ర్ వివేక్ కృష్ నాని మాట్లాడుతూ “సూప‌ర్‌ హీరో స్పైడ‌ర్ మ్యాన్ సినిమాల‌కు ఇండియాలో మంచి క్రేజ్ ఉంటుంది. ప్రారంభం నుండే “స్పైడ‌ర్ మ్యాన్: ఫార్ ఫ్ర‌మ్ హోం”పై భారీ అంచ‌నాలు నెలకొన్నాయి. ఈ నేప‌థ్యంలో సినిమాను జూలై 4న విడుద‌ల చేస్తున్నాం. 30నే ఈసినిమా బుకింగ్స్ ఓపెన్ అవుతాయి. హిందీ, తెలుగు, ఇంగ్లీష్‌, త‌మిళంలో సినిమాను విడుద‌ల చేస్తున్నాం” అని తెలిపారు. ఇది స్పైడర్ మ్యాన్ అభిమానులకు నిజంగా శుభవార్తే మరి.