telugu navyamedia
ట్రెండింగ్ సినిమా వార్తలు

ఆ నటిని నేను చంపలేదు… అయినా ఆరేళ్లుగా నరకం అనుభవిస్తున్నాను… : హీరో కామెంట్స్

Sooraj

బాలీవుడ్ నటుడు సూరజ్ పంచోలీ తన ప్రేయసి ఆత్మహత్యకు తనకు ఎలాంటి సంబంధం లేదని అంటున్నారు. ఆయన ప్రధాన పాత్రలో నటించిన చిత్రం ‘సాటిలైట్ శంకర్’. ఈ సినిమా ట్రైలర్ గురువారం విడుదలైంది. ఇదే అనువైన సమయం అని భావించిన సూరజ్, జియా కేసుపై మీడియా ద్వారా మాట్లాడారు. అసలేం జరిగిందంటే… బాలీవుడ్ నటి జియా ఖాన్, సూరజ్ చాలా కాలం పాటు ప్రేమించుకున్నారు. కానీ ఆరేళ్ల క్రితం జియా ఆత్మహత్య చేసుకుని చనిపోయారు. దాంతో జియా తల్లి రాబియా తన బిడ్డ చావుకి కారణం సూరజే అని పేర్కొంటూ పోలీసులకు ఫిర్యాదు చేసింది. దాంతో పోలీసులు సూరజ్‌ను అరెస్ట్ చేసి విచారించారు. ఈ ఘటన జరిగి ఆరేళ్లు అవుతున్నప్పటికీ సూరజ్ నిందితుడా కాదా అని తేల్చలేకపోతున్నారు. ఈ కేసు కొనసాగుతున్నా సూరజ్ సినిమా షూటింగ్‌లతో బిజీగా ఉన్నాడు.

ఈ సందర్భంగా సూరజ్ మాట్లాడుతూ “ఆరేళ్లుగా నేను నరకం అనుభవిస్తున్నాను. ఏ తప్పు చేయకుండానే 21 ఏళ్ల వయసులో నన్ను జైల్లో పెట్టారు. నాకు మన న్యాయ వ్యవస్థపై నమ్మకం ఉంది కాబట్టే ఇన్నాళ్లూ ఏమీ మాట్లాడకుండా మౌనంగా అన్నీ భరిస్తూ వచ్చాను. ఇక నా వల్ల కాదు. నేను చేయని తప్పుకు శిక్ష అనుభవించలేను. తీర్పు కోసం మరో 20 ఏళ్లు ఎదురుచూడలేను. ఈ కేసులో నన్ను ఇరికించారు కాబట్టి 21 ఏళ్ల వయసు నుంచి రోజూ కోర్టు చుట్టూ తిరుగుతున్నాను. మరో నెలలో నాకు 29 ఏళ్లు రాబోతున్నాయి. నాపై కేసు పెట్టారు కాబట్టి ఏ తప్పూ చేయకపోయినా నిజం తెలియాలని కేసును విచారించమని కోర్డుకు చెప్పింది నేనే. భారతీయ చరిత్రలో అలా చేసిన మొదటి వ్యక్తిని నేనే. కానీ నాపై కేసు పెట్టినవారు ఎక్కడ? జియా తల్లి రాబియా ఇప్పటివరకు ఒక్కసారి కూడా కోర్టుకు రాలేదు. రాబియాకు బ్రిటిష్ పాస్‌పోర్ట్ ఉంది కాబట్టి కోర్టుకు రావాల్సిన ప్రతిసారీ ఆమె లండన్‌కు వెళ్లిపోతున్నారు. దాంతో ఈ కేసు ఇప్పటివరకు కొనసాగుతూనే ఉంది. నేను ఈ కేసులో నిందితుడినా కానా అని తెలుసుకోవడానికి విచారణ కొనసాగించమని అడిగాను. ఇప్పటివరకు పోలీసులు నన్ను రెండుసార్లు విచారించారు. 22 ఏళ్ల వయసులో సీబీఐ విచారణకు హాజరయ్యాను. రాత్రి పగలు అని లేకుండా పోలీసులు రమ్మన్న ప్రతిసారీ వెళ్లాను. ఈ కేసుతో నాకు ఎలాంటి సంబంధం లేదని వారికి అర్థమైంది. అలాంప్పుడు న్యాయస్థానం నా విషయంలో ఎలాంటి తీర్పు ఎందుకు ఇవ్వడంలేదు. నాపై కేసు పెట్టిన రాబియా ఎందుకు కోర్టుకు రావడంలేదు. నేను దోషి అని నిరూపించాల్సిన బాధ్యత ఆమెదే కదా? అందుకే నా తరఫున మీడియా వారు మద్దతు తెలపాలని కోరుతున్నాను. ప్రతిసారీ ఈ కేసు గురించి మీడియా నన్ను ప్రశ్నిస్తూనే ఉంది. కోర్టు తీర్పు చెప్పకపోతే నేనేం చేయాలి? నాకు సాయం చేయండి. ఈ కేసు త్వరలోనే ముగింపు పలుకుతుందని ఆశిస్తున్నాను. ఇక నా వల్ల కావడం లేదు” అని వెల్లడించాడు సూరజ్.

Related posts