శ్రీకాకుళంలో విషాదం చోటుచేసుకుంది. ఉదయం విద్యార్థులంతా ఉత్సాహంగా బడికి బయలుదేరారు.ఇంతలోనే అనుకోని ప్రమాదం ఎదురైంది. బస్సుకు ఏదైనా అడ్డం వచ్చిందో లేక దానంతట అదే జరిగిందో తెలియదు కానీ అకస్మాత్తుగా బస్సు చెరువులోకి బోల్తా కొట్టింది. ఘటనలో ఓ విద్యార్థి ప్రాణాలు కోల్పోయాడు.
వివ‌ర్లాలోకి వెళితే..
శ్రీకాకుళం జిల్లాలోని ఎచ్చెర్ల మండలం బడివానిపేట సమీపంలోని నల్ల చెరువులో బుధవారం ఉదయం కొంగర గ్రామానికి చెందిన ఓ ప్రైవేటు స్కూల్ బస్సు అదుపుతప్పి చెరువులో బోల్తా పడింది. బస్సు ఒక్కసారిగా చెరువులో బోల్తా పడటంతో ఓ విద్యార్థి బస్సు కింద పడి అక్కడికక్కడే మృతిచెందాడు. ముగ్గురు విద్యార్థులకు తీవ్రగాయాలయ్యాయి.
ఈ ప్రమాద సమయంలో బస్సులో ఎనిమిది మంది విద్యార్థులు ఉన్నారు. మిగిలిన విద్యార్థులను స్థానికులు చెరువులో నుంచి ఒక్కొక్కరిని బయటకు తీసి చికిత్స కోసం ఆస్పత్రికి తరలించారు. దీంతో ఆ ప్రాంతంలో విషాదం చోటుచేసుకుంది. సమాచారం అందిన వెంటనే పోలీసులు అక్కడకు చేరుకుని కేసు నమోదు చేసి దర్యాప్తు చేపట్టారు. చెరువులో పడ్డ బస్సును వెలికితీస్తున్నారు.