దిగ్గజ గాయని ఎస్.జానకి చనిపోయారంటూ ఆదివారం సోషల్ మీడియాలో వదంతులు వచ్చిన విషయం తెలిసిందే. ఎవరో సోషల్ మీడియాలో పుట్టించిన ఈ తప్పుడు వార్త క్షణాల్లో వైరల్ అయిపోయింది. దీంతో జానకి కుమారుడు మురళీ కృష్ణ స్పందించాల్సి వచ్చింది. కాగా ఈ వదంతులపై ఇప్పుడు స్వయంగా జానకి అమ్మ స్పందించారు. ఇలాంటి వదంతులు పుట్టించేవారిపై ఆమె మండిపడ్డారు. ఈ మేరకు ఒక ఆడియో మెసేజ్‌ను విడుదల చేశారు. ‘‘నాపాటికి నేను ఎక్కడో ఉన్నాను. హైదరాబాద్‌లో కూడా లేను మైసూరులో ఉన్నాను. ఆరోగ్యంగా ఉన్నాను. నాకే సమస్యా లేదు. ఎవరో అనవసరంగా పిచ్చిపిచ్చిగా ఏవేవో పెడుతుంటారు. ఇలాంటివి నమ్ముతూ కూర్చుంటే మనం ఏం చేయలేం. ఉన్నారా లేదా అని తెలుసుకుని పెట్టాలి. వాళ్లకు ఇష్టమొచ్చినట్టు వీళ్లు చచ్చారు.. వాళ్లు చచ్చారు అని పెట్టడమేంటి? హైదరాబాద్‌లో కరోనా మరీ ఎక్కువగా ఉందంటున్నారు. మీరు జాగ్రత్తగా ఉండండి’’ అని జానకి అసహనం వ్యక్తం చేశారు. తన తల్లి ఆరోగ్యంగా ఉన్నారని, దయచేసి ఇలాంటి రూమర్లు వ్యాప్తి చేయొద్దని ఆదివారం సాయంత్రం మురళీ కృష్ణ వేడుకున్నారు. అలాగే, గానగంధర్వుడు ఎస్పీ బాలసుబ్రహ్మణ్యం కూడా ఈ రూమర్లపై ఆగ్రహం వ్యక్తం చేశారు. ఇలాంటి పనికిమాలిన రూమర్లు ఎందుకు క్రియేట్ చేస్తారో అర్థం కావడం లేదని మండిపడ్డారు. తాను జానకి అమ్మతో మాట్లాడానని, ఆమె ఆరోగ్యంగా ఉన్నారని వెల్లడించారు. దయచేసి సోషల్ మీడియాలో పాజిటివిటీని వ్యాప్తి చేయాలని, ఇలాంటి వదంతులతో ఇతరులను బాధ పెట్టవద్దని ఆయన విజ్ఞప్తి చేశారు. ఎంతో మంది ఫ్యాన్స్ ఫోన్ చేసి ఏడుస్తున్నారని, వాళ్లను ఓదార్చడమే తనకు సరిపోయిందని అన్నారు. తెలిసీ తెలియకుండా పిచ్చిపిచ్చిగా ఇలాంటి వదంతులు ఎందుకు పుట్టిస్తారో అర్థం కావడంలేదని ఆవేదన వ్యక్తం చేశారు’ అని తన మెసేజ్‌లో జానకి వెల్లడించారు.
తప్పుడు ప్రచారంపై దిగ్గజ గాయని ఎస్.జానకి ఫైర్
అసభ్య పదజాలంతో నాగబాబు వివాదాస్పద వ్యాఖ్యలు