సూపర్స్టార్ రజనీకాంత్ హీరోగా నటిస్తున్న తమిళ మూవీ ‘అన్నాత్తె’ తెలుగులో ‘పెద్దన్న’గా రాబోతోంది. యాక్షన్ దర్శకుడు శివ దర్శకత్వంలో తెరకెక్కిన ఈ సినిమాలో నయనతార హీరోయిన్ గా నటిస్తుంది.
ఎమోషన్ కూడిన యాక్షన్ ఎంటర్టైనర్గా పెద్దన్న సినిమా దీపావళి కానుకగా నవంబర్ 4న థియేటర్లలో విడుదల కానుంది. ఈ క్రమంలో తాజాగా ఈ సినిమానుంచి ట్రైలర్ ను చిత్ర యూనిట్ విడుదల చేశారు. ఇప్పటికే పెద్దన్న మోషన్ పోస్టర్ విడుదల చేశారు. దీనికి మంచి రెస్పాన్స్ వచ్చింది.
‘నువ్వు ఎవరు అనేది నువ్వు వెనకేసుకున్న ఆస్తిలోనో.. లేదా నీ చుట్టూ ఉన్నవాళ్లకు నీ మీద ఉన్న భయంలోనో లేదు’.. నువ్వు చేసే చర్యల్లోనూ.. మాట్లాడే మాటాల్లోనూ ఉంటుంది. ఇది వేదవాక్కు’ అంటూ రజనీ చెప్పే డైలాగుతో ఈ ట్రైలర్ ప్రారంభం అవుతుంది. పేరు వీరన్న..ఊరు రాజోలు..చుట్టుప్రక్క గ్రామాలకు పంచాయితీ పెద్ద అన్న డైలాగ్ అదిరింది.
రజనీకాంత్ అభిమానులు కోరుకునే యాక్షన్, కామెడీ.. ఇలా అన్ని అంశాలతో ఈ మూవీని తెరకెక్కించినట్లు ట్రైలర్ చూస్తే అర్థమవుతుంది. ఈ చిత్రానికి డి.ఇమాన్ సంగీతం సమకూర్చాడు.
ఈ చిత్రంలో రజనీకాంత్కు చెల్లెలి పాత్రలో మహానటి ఫేం కీర్తి సురేష్ నటిస్తుండగా.. మీనా, ఖుష్బూ, జగపతిబాబు ప్రధాన పాత్రలు పోషిస్తున్నారు. శివ దర్శకత్వంలో సన్ పిక్చర్స్ సంస్థ ఈ సినిమాను నిర్మించింది.