యూపీలోని హత్రాస్ హత్యాచార ఘటన నేపథ్యంలో నిన్న బాధిత కుటుంబాన్ని కలవడానికి వెళుతుండగా కాంగ్రెస్ నేత రాహుల్ గాంధీని పోలీసులు అడ్డగించిన సంగతి తెలిసిందే. లాల్చీ పట్టుకుని యూపీ పోలీసులు లాగేయడంతో రాహుల్ కిందపడ్డారు. ఆయన భుజానికి స్వల్పగాయమైంది.
ఈ నేపథ్యంలో రాహుల్ ఘాటుగా స్పందించారు. గాంధీ జయంతి సందర్భంగా శుభాకాంక్షలు తెలుపుతూ ఆయన ట్వీట్ చేశారు. ఏ విధమైన అన్యాయానికీ తాను తలవంచనని రాహుల్ చెప్పారు. అసత్యాలను సత్యానికి ఉన్న శక్తితో జయిస్తానని పేర్కొన్నారు. అసత్యంతో పోరాడే సమయంలో ఎదురయ్యే అన్ని అడ్డంకులను తాను ఎదుర్కొంటానని తెలిపారు. ఈ ప్రపంచంలో ఎవరికీ భయపడనని రాహుల్ వ్యాఖ్యానించారు.