వైసీపీ ప్రభుత్వాన్ని నరసాపురం ఎంపీ రఘురామకృష్ణరాజు మరోసారి టార్గెట్ చేశారు. ఏపీలో ఒక సామాజిక వర్గానికే అత్యధిక పోస్టులు లభిస్తున్నాయని ఆరోపించారు. కీలక స్థానాల్లో వాళ్లే ఉన్నారంటూ వైసీపీ సర్కారుపై విమర్శలు గుప్పించారు. అర్హతలు లేకపోయినా కేవలం ఓ సామాజిక వర్గం వారికే పోస్టులు ఇస్తున్నారని దుయ్యబట్టారు. ఎక్కడైనా రెండు పోస్టులు ఉంటే ఒకటి ఆ సామాజిక వర్గానికి, రెండోది ఇతరులకు ఇస్తున్నారని తెలిపారు.
ఈ సందర్భంగా టాలీవుడ్ సూపర్ హిట్ మూవీ ‘దూకుడు’ సినిమాలో మహేశ్ బాబు పలికిన “హే మళ్లీ ఏసేశాడు” అనే డైలాగును వినిపించారు. మంచి చేస్తే మూడు దశాబ్దాలు ఉంటారని, ఈ విషయం సీఎం జగన్ ఆలోచించుకోవాలని హితవు పలికారు. ఫలానా శాఖలో ఈ రెడ్డి.. ఫలానా శాఖలో ఆ రెడ్డి అంటూ ఏపీలో అత్యధిక పోస్టుల్లో కొనసాగుతున్న ఒకే సామాజిక వర్గానికి చెందిన వారి పేర్లను ఆయన చదివి వినిపించారు.