దేశవ్యాప్తంగా కరోనా విజృంభించడంతో రోజురోజుకు కేసులు భారీగా పెరుగుతున్నాయి. ఈ నేపథ్యంలో కరోనా రక్కసి నుంచి ప్రజలను కాపాడేందుకు మాస్కుల కంపెనీలు పెద్దమొత్తంలో మాస్కులను తయారు చేస్తున్నాయి. పుదుచ్చేరిలో మాస్కులను తయారు చేస్తున్న కంపెనీపై కరోనా పంజా విసిరింది.
కంపెనీలో పని చేస్తున్న 70 మంది మహమ్మారి బారిన పడ్డారు. ఈ ఘటనపై పుదుచ్చేరి ముఖ్యమంత్రి నారాయణస్వామి ఆగ్రహం వ్యక్తం చేశారు. కంపెనీ నిర్వాహకుల నిర్లక్ష్యమే దీనికి కారణమని మండిపడ్డారు. ప్లాంట్ ను వెంటనే సీజ్ చేయాలని సంబంధిత అధికారులను ఆదేశించారు. మరోవైపు సీఎం ఆదేశాలతో సదరు కంపెనీ నిర్వాహకులపై కేసు నమోదు చేశారు.