“అబ్దుల్ కలాం”గా అలీ… ఫస్ట్ లుక్

మాజీ రాష్ట్రపతి ఏపిజే అబ్దుల్ కలాం బయోపిక్ తెరకెక్కనున్న విషయం తెలిసిందే. దర్శకుడు జగదీష్ దానేటీ, నిర్మాత జాన్ మార్టిన్ నేతృత్వంలో ఈ సినిమా రూపొందుతోంది. టాలీవుడ్, హాలీవుడ్ కలయికతో సినిమాను నిర్మించనున్నారు. దీనికి సంబంధించిన ఫస్ట్ లుక్ పోస్టర్ ను తాజాగా విడుదల చేశారు. ఈ కార్యక్రమంలో కేంద్ర మంత్రి ప్రకాశ్ జవదేకర్, సినీ నటుడు ఆలీ పాల్గొన్నారు. కలాం లాంటి వ్యక్తి సినిమా తీయడం సంతోషమని ప్రకాశ్ జవదేకర్ వెల్లడించారు. ప్రజల మనసు గెలుచుకున్న గొప్ప వ్యక్తి, చివరి వరకు అబ్దల్ కలాం సామాన్యుడిలా జీవించారని కొనియాడారు. భారతదేశానికి శాటిలైట్ సేవలు అందించిన ఘనత కలాందేనన్నారు. ఇక ఆలీ మాట్లాడుతూ అబ్దుల్ కలాంకు తాను 40 ఏళ్లుగా పెద్ద అభిమానినని, గొప్ప వ్యక్తి బయోపిక్ చేయడం ఎంతో సంతోషంగా ఉందన్నారు. కలాం పాత్రకు తాను సూట్ అవుతానని చిత్ర నిర్మాతలు భావించడం గొప్ప అదృష్టంగా భావిస్తున్నట్లు చెప్పారు. సుమారు రెండు గంటల పాటు సినిమా ఉంటుందని, మార్చిలో షూటింగ్ ప్రారంభమై, అక్టోబర్ నెలలో చిత్రం రిలీజ్ అవుతుందని వెల్లడించారు.