కన్నడ స్టార్ యశ్ హీరోగా రూపొందుతున్న భారీ యాక్షన్ మూవీ “కెజిఎఫ్-2”. ప్ర‌శాంత్ నీల్ దర్శకత్వంలో రూపొందుతోన్న భారీ ప్యాన్ ఇండియా మూవీలో సంజయ్ దత్ ప్రతినాయకుడిగా నటిస్తున్నారు. తెలుగు, తమిళ, మలయాళ, కన్నడ, హిందీ భాషల్లో ఈ చిత్రాన్ని విడుదల చేయబోతున్నారు. తెలుగులో వారాహి చలన చిత్రం వారు గ్రాండ్‌గా రిలీజ్ చేయనున్నారు. ఇక ఈ చిత్రంలో యశ్ సరసన శ్రీనిధి శెట్టి హీరోయిన్‌గా నటిస్తుండగా..రవీనా టండన్‌ మరో కీలకపాత్ర పోషిస్తోంది. ర‌వి బ‌స్రూర్ సంగీతం సమకూర్చుతున్నారు.
బాలీవుడ్ స్టార్ సంజయ్ దత్ ఈ చిత్రంలో ‘అధీరా’గా సంజయ్ కనిపించనున్నారు. అయితే సంజయ్ ముంబై బాంబు పేలుళ్ల కేసులో నిందితుడిగా శిక్ష అనుభవించిన సంగతి తెలిసిందే. దీన్నే కారణంగా చూపుతూ ఓ నిందితుడు నటిస్తున్న సినిమాకు ప్రభుత్వం ఎలా అనుమతి ఇస్తుందని హుబ్లీకి చెందిన ఓ వ్యక్తి హైకోర్టులో పిటిషన్ దాఖలు చేశాడు. ఈ నేపథ్యంలో పిటిషన్‌పై జరిగిన అనేక వాదోపవాదాల అనంతరం కెజిఎఫ్-2 సినిమా యూనిట్‌కి ఫేవర్‌గా హైకోర్టు తీర్పునిచ్చింది. ఒక సినిమాలో నటించడాన్ని నిషేధించిన చట్టాన్ని పిటిషనర్‌ తరఫున న్యాయవాది చూపించలేకపోవడంతో ప్రధాన న్యాయమూర్తి అభయ్ శ్రీనివాస్ ఓకా, జస్టిస్ అశోక్ ఎస్ కినాగీతో కూడిన డివిజన్ బెంచ్ సంజయ్ దత్‌పై దాఖలైన పిటిషన్‌ను కొట్టివేసింది. దీంతో కేజీఎఫ్ 2 విడుదలకి లైన్ క్లియర్ అయింది.