అమెరికాలోని సియాటెల్లో గూగుల్ సంస్థ ఆఫీసు కోసం చేస్తున్న నిర్మాణంలో విషాదం చోటుచేసుకుంది. ఆదివారం సాయంత్రం భారీ గాలులు వీయడంతో భవన నిర్మాణంలో ఉపయోగిస్తున్న ఓ క్రేన్ విరిగిపడింది. 9వ అంతస్తు నిర్మాణం కోసం ఈ క్రేన్ను ఉపయోగిస్తున్నారు. రద్దీగా ఉండే రోడ్డు పక్కనే ఈ నిర్మాణం జరుగుతోంది. ఈ క్రేన్ గాలికి ఊగడాన్ని దూరం నుంచి చూసిన కొందరు వాహనదారులు ఎక్కడికక్కడ ఆగిపోయారు. ముంచుకొస్తున్న ప్రమాదాన్ని గమనించని కొందరు ముందుకు వెళ్లి ఆ క్రేన్ కిందపడ్డారు. ఈ ఘటనలో ఇద్దరు క్రేన్ ఆపరేటర్లు, ఇద్దరు వాహనదారులు మృతిచెందగా, మరో ముగ్గురికి తీవ్రమైన గాయాలయ్యాయి. గాయపడిన వారిని సమీపంలోని ఆస్పత్రికి తరలించారు. అమెజాన్, గూగుల్ వంటి బడాబడా సంస్థలన్నీ సియాటెల్లో ఆఫీసుల నిర్మాణం చేపట్టడంతో మునుపెన్నడూ లేని విధంగా ఈ ప్రాంతంలో క్రేన్లు దర్శనమిస్తున్నాయి.