ఉత్తర ప్రదేశ్‌లోని కాన్పూర్‌లోని బికన్‌గంజ్‌లో చోటు చేసుకున్న ఘటన అందర్నీ ముక్కున వేలేసుకునేలా చేసింది. ఓ వ్యక్తి తన మేకను తీసుకొని రోడ్డు మీద నుంచి వెళ్తుండగా.. పోలీసులు దాని యజమానిని అడ్డగించారు. మేకకు మాస్కు పెట్టలేదేంటని ప్రశ్నించారు. పోలీసుల ప్రశ్నలకు బిత్తరపోవడం అతడి వంతైంది. వారి ప్రశ్నలకు సమాధానం చెప్పలేక భయంతో దాన్ని అక్కడే వదిలేసి పరుగు అందుకున్నాడు. దీంతో పోలీసులు ఆ మేకను స్టేషన్కు త‌ర‌లించారు. పోలీసులు వెళ్లిపోయాక వచ్చి చూస్తే ఆ యజమానికి తన మేక కనపించలేదు. అసలు విషయం తెలియడంతో అతడు పోలీస్‌ స్టేషన్కు వెళ్లక తప్పలేదు. ‘నా మేకను ఎందుకు తీసుకొచ్చారు?’ అని ఆ యజమాని పోలీసులను ప్రశ్నించాడు. మాస్కు లేకపోవడంతో దాన్ని అరెస్టు చేశామని పోలీసులు చెప్పడంతో అతడు షాక్‌ తిన్నాడు. ఇకపై తన మేకకు మాస్కు పెట్టిన తర్వాతే బయటకు తీసుకొస్తానని హామీ ఇచ్చిన తర్వాతే పోలీసులు అతడిని వదిలిపెట్టారు. పోలీసుల చ‌ర్యపై సోషల్ మీడియాలో విపరీతమైన ట్రోలింగ్‌ చేస్తున్నారు. ఈ నేపథ్యంలో న్యూస్ ఏజెన్సీ ఐఏఎన్‌ఎస్ ప్రతినిధి ఈ ఘటనపై వారిని ప్రశ్నించారు. ‘ప్రజలు ప్రస్తుతం తమ పెంపుడు కుక్కలకు మాస్కులు ధరింపజేస్తున్నారు. మరి మేకలకు ఎందుకు ఉండకూడదు?’ అని అన్వర్‌గంజ్ సర్కిల్ ఆఫీసర్ ఎదురు ప్రశ్నించారు. అయితే.. తమపై విమర్శలు వెల్లువెత్తుతాన్దడంతో ‘అతడు (మేక యజమాని) మాస్కు లేకుండా రోడ్డుపై తిరుగుతున్నాడు. పట్టుకుందామని వెళ్లే సరికి తప్పించుకొని పారిపోయాడు. దీంతో మేకను తీసుకు రావాల్సి వచ్చింది’ అని సమాధానం ఇచ్చారు. ఈ విషయం ఇప్పుడు సోషల్ మీడియాలో హాట్ టాపిక్ గా మారింది.
ఇదెక్కడి విచిత్రం… మాస్క్ లేదని మేక అరెస్ట్…!!
