ప్రపంచవ్యాప్తంగా కరోనా వైరస్ కేసుల సంఖ్య 1.34 లక్షలకు చేరింది. దాదాపు 5 వేల మంది కోవిడ్ బారిన పడి ప్రాణాలు కోల్పోయారు. భారత్‌లో తొలి కోవిడ్ మరణం నమోదైంది. మన దేశంలో 75 మందికి కరోనా సోకినట్లు నిర్ధారణ అయ్యింది. వీరిలో 57 మంది భారతీయులు కాగా మిగతా వాళ్లు విదేశీయలు. కరోనా వ్యాప్తిని అరికట్టడం కోసం భారత్ వీసాలను రద్దు చేసింది. కరోనా లక్షణాలు, తీసుకోవాల్సిన జాగ్రత్త చర్యలపై ఇప్పటికే ముమ్మరంగా ప్రచారం చేస్తోంది. ప్రజలకు సాయంగా ఉండటం కోసం కేంద్ర ఆర్యోగ మరియు కుటుంబ సంక్షేమ శాఖ రాష్ట్రాల వారీగా హెల్ప్‌లైన్ నంబర్లను వెబ్‌సైట్లో ఉంచింది.
కరోనా గురించి అనుమానాల నివృత్తి కోసం, లేదా కోవిడ్ లక్షణాలు కనిపించిన వారు సెంట్రల్ హెల్ప్ లైన్ నంబర్ +91-11-23978046కు డయల్ చేయొచ్చు. ఆంధ్రప్రదేశ్ ప్రజలు 0866-2410978 నంబర్‌కు, తెలంగాణ, కర్ణాటక ప్రజలు 104కు కూడా డయల్ చేయవచ్చు. తమిళనాడులో ఉంటున్నవారు 044-29510500 నంబర్‌కు డయల్ చేయాల్సి ఉంటుంది. ఢిల్లీలో ఉంటున్న వారు 011-22307145 నంబర్‌కు డయల్ చేయొచ్చు. కరోనాను ఎదుర్కోవడం కోసం ఏపీ, తెలంగాణ ముందస్తుగానే సన్నద్ధమైన సంగతి తెలిసిందే. తెలంగాణలో కోవిడ్ సోకిన వ్యక్తికి చికిత్స అనంతరం నెగటివ్ రాగా.. ఏపీలో ఒకరికి కరోనా సోకినట్లు తేలింది. ప్రస్తుతం అతడు నెల్లూరులోని ఐసోలేషన్ వార్డులో చికిత్స పొందుతున్నాడు. కోవిడ్‌ను ఎదుర్కోవడం కోసం జగన్ సర్కారు జిల్లాల వారీగా కంట్రోల్ రూంలను ఏర్పాటు చేసింది.
