ప్రముఖ హాలీవుడ్ నటుడు క్రిస్ ప్రాట్ సరదాగా పెట్టిన పోస్ట్ బ్యాక్‌ఫైర్ అయ్యి తిరిగి ఆయనకే తగిలింది. అసలేం జరిగిందంటే… క్రిస్ ప్రాట్ కోసం అతని భార్య కేథరీన్ ష్వార్జ్‌నెగ్గర్ వంట చేసి పెట్టింది. అయితే అది కాస్తా మాడిపోయింది. మాడిపోయిన ఆ వంటకాన్ని క్రిస్ ఫొటో తీశాడు. అంతటితో ఆగకుండా దానిని సోషల్ మీడియాలో పోస్ట్ చేశాడు. తన భార్యకు వంట రాదంటూ పరోక్షంగా కామెంట్లు చేశాడు. “నాకు వంట చేసి పెట్టినందుకు నా డార్లింగ్‌కు ధన్యవాదాలు. కానీ ఈ వంటకం సరిగ్గా రాలేదు. మాడిపోయింది. ఇలా ఎందుకు జరిగిందో నాకు తెలీదు. నేను ఓవెన్‌లో రెండు నిమిషాల పాటు ఉంచి వేడి చేయమన్నాను. కానీ నా భార్యకు రెండు గంటలు అని అర్థమైనట్లుంది. కానీ తను ఈ వంటకాన్ని ప్రయత్నించినందుకు అభినందిస్తున్నాను. తనని చూస్తుంటే గర్వంగా ఉంది’ అని పేర్కొన్నాడు. తన భార్య వంట చేసినందుకు మెచ్చుకుంటూనే మరోపక్క మాడిపోయిన వంట గురించి కామెంట్స్ చేశాడు. ఈ ఫొటోను ఇప్పటివరకు పది లక్షల మందికి పైగా లైక్ చేశాడు. అయితే కొందరు నెటిజన్లకు మాత్రం క్రిస్ ప్రవర్తన నచ్చలేదు. ఎందుకంటే కేథరీన్ ఓ రచయిత్రి. అలాంటిది ఆమె ఓ ఇల్లాలిగా భర్తకు వండిపెడుతుంటే అభినందించాల్సిందిపోయి సెటైర్ వేయడం కరెక్ట్ కాదంటూ నెటిజన్లు క్రిస్‌కు క్లాస్ పీకుతున్నారు. మరి కొంతమంది మాత్రం భార్యతో సరదాగా ఇలా చేస్తే తప్పేముంది ? అంటున్నారు.
స్టార్ హీరోకు భార్య చేతి వంట తెచ్చిన తంటా
