“జగదేక వీరుడు అతిలోక సుందరి”ల పారితోషికం ఎంతంటే…?

మెగాస్టార్ చిరంజీవి, అతిలోక సుందరి శ్రీదేవి హీరోహీరోయిన్లుగా దర్శకేంద్రుడు కె.రాఘవేంద్రరావు దర్శకత్వంలో తెరకెక్కిన సూపర్ హిట్ మూవీ ‘జగదేక వీరుడు అతిలోక సుందరి’. వైజయంతీ మూవీస్ బ్యానర్‌పై సి.అశ్వనీదత్ ఈ సినిమాను నిర్మించారు. ఈ సినిమా తెలుగు సినిమా చరిత్రలో ఒక మైలురాయిలా నిలిచిపోయింది. 1990లో విడుదలైన ఈ చిత్రం మే 9తో 30 సంవత్సరాలు పూర్తి చేసుకున్న విషయం తెలిసిందే. ఈ సందర్భంగా సినిమాకు సంబంధించిన వార్తలు కొన్ని రోజులుగా షికారు చేస్తున్నాయి. ఈ సినిమా కోసం చిరంజీవి – శ్రీదేవి ఎంత పారితోషికం తీసుకుని ఉంటారనేది అభిమానుల్లో ఆసక్తిని రేకెత్తిస్తోంది. చిరంజీవి 35 లక్షలను పారితోషికంగా తీసుకుంటే, శ్రీదేవి 25 లక్షలను తన పారితోషికంగా అందుకున్నారనేది తాజా సమాచారం. బాల్కనీ టికెట్ 6 రూపాయలకి మాత్రమే అమ్మిన ఆ రోజుల్లో, ఈ సినిమా 7 కోట్ల షేర్ ను రాబట్టడం విశేషం. ఈ సినిమా తరువాత చిరంజీవి పారితోషికం ఒక రేంజ్ లో పెరిగిందని అంటారు.