ఏప్రిల్ లో నాగ చైతన్య, సాయి పల్లవి చిత్రం

“ఫిదా” తరువాత చాలా గ్యాప్ తీసుకున్న శేఖర్ కమ్ముల దర్శకత్వంలో నాగ చైత‌న్య, సాయి ప‌ల్ల‌వి ప్ర‌ధాన పాత్ర‌ల‌లో ఒక రొమాంటిక్ లవ్ ఎంట‌ర్‌టైన‌ర్ రూపొందిస్తున్న విషయం విదితమే. నారాయణదాస్ నారంగ్, ఎఫ్.డి.సి చైర్మైన్ రామ్మోహనరావు ఈ చిత్రానికి నిర్మాతలు. ఈ చిత్రం “ల‌వ్ స్టోరీ” పేరుతో ప్ర‌చారం జ‌రుపుకుంటుంది. ఇటీవ‌ల చైతూ బ‌ర్త్‌డే సంద‌ర్భంగా చిత్ర టీజ‌ర్ ఒక‌టి విడుద‌ల చేశారు. ఇందులో చైతూ కూల్ లుక్‌ అందరినీ ఆకట్టుకుంది. శ‌ర‌వేగంగా షూటింగ్ జ‌రుపుకుంటున్న ఈ చిత్రాన్ని ఏప్రిల్ 2న విడుద‌ల చేయాల‌ని మేక‌ర్స్ భావిస్తున్నారు. తెలంగాణ నేప‌థ్యంలో రూపొందుతున్న ఈ చిత్రం ప్రేక్ష‌కుల‌ని త‌ప్ప‌క అలరిస్తుంద‌ని చెబుతున్నారు. ఫిదా చిత్రం త‌ర్వాత శేఖ‌ర్ క‌మ్ముల చేస్తున్న ఈ సినిమాపై భారీ అంచ‌నాలు ఉన్నాయి.