వివాదాస్పద చిత్రాలు, కామెంట్స్ తో వార్తల్లో నిలిచే సంచలన దర్శకుడు రామ్ గోపాల్ వర్మ “కమ్మ రాజ్యంలో కడప రెడ్లు” అనే సినిమా రూపొందిస్తున్న విషయం తెలిసిందే. క్యాస్ట్ ఫీలింగ్ ఆధారంగా తెరకెక్కుతున్న ఈ సినిమాకు సంబందించిన అప్డేట్స్ తోనే ఆర్జీవీ షాకిస్తున్నాడు. ఇప్పటికే తనను కించపరిచేలా ‘కమ్మరాజ్యంలో కడపరెడ్లు’ సినిమా ట్రైలర్ ఉందని, ఆ సినిమా విడుదల కాకుండా అడ్డుకోవాలని ప్రశాంతి పార్టీ అధినేత కేఏ పాల్ ఇది వరకే హైకోర్టును ఆశ్రయించిన విషయం తెలిసిందే. కాగా కమ్మ రాజ్యంలో కడప రెడ్లు చిత్రం విడుదలకు టీఎస్ హైకోర్టు బ్రేక్ వేసింది. చిత్ర విడుదలకు వీలులేకుండా ఈరోజు హైకోర్టు ఆదేశాలు జారీ చేసింది. వారం రోజుల్లో సినిమాను చూసి సెన్సార్ సర్టిఫికేట్ ఇవ్వాలని సెన్సార్ బోర్డును హైకోర్టు ఆదేశించింది. రెండు కులాల మధ్య చిచ్చు పెట్టేలా సినిమా టైటిల్ ఉందని, దాన్ని మార్చాలని సూచించింది. ఇదిలా ఉంటే, ఈ టైటిల్ విషయమై ఆంధ్రప్రదేశ్ ప్రభుత్వం హైదరాబాద్‌లోని ప్రాంతీయ సెన్సార్ బోర్డు ఒక లేఖ రాసింది. ప్రభుత్వ సలహాదారు (పబ్లిక్ అఫైర్స్) సజ్జల రామకృష్ణారెడ్డి పేరిట ఈరోజు రీజినల్ సెన్సార్ బోర్డుకు ఒక లేఖ అందింది. చిత్ర టైటిల్‌ను మార్చాల్సిందిగా ఈ లేఖలో రీజినల్ సెన్సార్ ఆఫీసర్‌ను సజ్జల రామకృష్ణారెడ్డి కోరారు. “రామ్ గోపాల్ వర్మ దర్శకత్వం వహించిన తెలుగు సినిమా ‘కమ్మరాజ్యంలో కడపరెడ్లు’ నవంబర్ 29న ఆంధ్రప్రదేశ్‌తో పాటు ఇతర రాష్ట్రాల్లో విడుదలవుతోంది. ఈ చిత్ర టైటిల్, పోస్టర్లు రెండు కులాల మధ్య చిచ్చు పెట్టే విధంగా ఉన్నాయి. అలాగే, ఇప్పటికే విడుదలైన రెండు ట్రైలర్లు టెంపోను బిల్డప్ చేశాయి. టీజర్లు కూడా కలకలం సృష్టించాయి. రెండు కులాలను లక్ష్యంగా చేస్తూ పెట్టిన ఈ టైటిల్‌ను సామాజిక దృక్పథం కలిగి ఉన్న ఈ సవ్య సమాజం అంగీకరించదు. అందుకని ఈ చిత్ర టైటిల్‌ను మార్చాల్సిందిగా సంబంధిత నిర్మాణ సంస్థకు సూచించాలని కోరుతున్నాం. సినిమా, స్టోరీలైన్, కంటెంట్, అసలు దీనిలో ఏం చూపించారు వంటి విషయాలు పక్కనబెడితే అసలు టైటిలే అంగీకరించలేని విధంగా ఉందని మేం బలంగా నమ్ముతున్నాం. సమాజం అంగీకరించే విధంగా టైటిల్‌ను మార్చాలి. టైగర్ కంపెనీ ప్రొడక్షన్, అజయ్ మైసూర్ ప్రొడక్షన్ బ్యానర్లపై టి. శ్రీధర్, టి. నరేష్ కుమార్ ఈ చిత్రాన్ని నిర్మించారు” అని ఆ లేఖలో సజ్జల రామకృష్ణారెడ్డి పేర్కొన్నారు. కాగా, టైటిల్ విషయంలో సెన్సార్ బోర్డు అభ్యంతరం వ్యక్తం చేస్తే తమ వద్ద ప్రత్యామ్నాయం ఉందని ఇప్పటికే రామ్ గోపాల్ వర్మ వెల్లడించారు. టైటిల్‌ను ‘‘అమ్మ రాజ్యంలో కడప బిడ్డలు’’ అని మారుస్తామని స్పష్టం చేశారు.
