బాహుబలి తో దేశవ్యాప్తంగా క్రేజ్‌ను సంపాదించుకున్న ప్రభాస్ తదుపరి చిత్రాన్ని ప్రకటించారు. ‘మహానటి తో విమర్శకుల ప్రశంసలతో పాటు ఎన్నో అవార్డులను సొంతం చేసుకున్న నాగ్ అశ్విన్ దర్శకత్వంలో ప్రభాస్ నటించబోతున్నారు. ప్రముఖ వైజయంతీ మూవీస్ ఈ చిత్రాన్ని నిర్మించనుంది. దీనికి సంబంధించిన అధికారిక ప్రకటన వచ్చేసింది. వైజయంతీ మూవీస్ 50సంవత్సరాలు పూర్తి చేసుకున్న సందర్భంగా ఈ బిగ్ ప్రాజెక్ట్‌ను అనౌన్స్ చేశారు. ఇక ఈ విషయం తెలిసిన ఫ్యాన్స్ సంబరాలు జరుపుకుంటున్నారు. ‘మరో బ్లాక్ బస్టర్‌ ఆన్ ది వే’ అంటూ వారు సోషల్ మీడియాలో కామెంట్లు పెడుతున్నారు. కాగా ప్రస్తుతం ప్రభాస్, రాధాకృష్ణకుమార్ దర్శకత్వంలో 20వ చిత్రంలో నటిస్తున్నారు. పీరియాడిక్ లవ్‌ స్టోరీగా తెరకెక్కుతోన్న ఈ మూవీలో ప్రభాస్ సరసన పూజా హెగ్డే నటిస్తోంది. యూవీ క్రియేషన్స్, గోపీకృష్ణ బ్యానర్స్ సంయుక్తంగా నిర్మిస్తోన్న ఈ చిత్రానికి అమిత్ త్రివేది సంగీతం అందిస్తున్నారు. ఈ ఏడాదే ఈ చిత్రాన్ని ప్రేక్షకుల ముందుకు తీసుకురావాలని దర్శకనిర్మాతలు భావిస్తున్నారు. మరోవైపు 2018లో మహానటితో పెద్ద విజయాన్ని ఖాతాలో వేసుకున్న నాగ్ అశ్విన్.. ఆ తరువాత ఏడాదిన్నరకు పైగా గ్యాప్ తీసుకున్నారు. ఈ క్రమంలో ఆ మధ్యన ‘జాతి రత్నాలు’ అనే సినిమా కోసం నిర్మాతగా కూడా మారారు. ఇక ఇప్పుడు ప్రభాస్ కోసం ఓ కథను సిద్ధం చేసుకున్న ఈ సెన్సేషనల్ దర్శకుడు.. త్వరలో ఈ మూవీని సెట్స్ మీదకు తీసుకెళ్లనున్నారు.
“మహానటి” డైరెక్టర్ నాగ్ అశ్విన్ దర్శకత్వంలో ప్రభాస్…!
