కనీసం శవాన్ని తాకనివ్వడం లేదు… హీరోయిన్ ఆవేదన

కరోనా మహమ్మారి ప్రపంచాన్ని వణికిస్తోంది. చైనాలో పుట్టిన ఈ భయంకర వైరస్ ఇటలీ, స్పెయిన్ దేశాల్లో విళయతాండవం చేస్తోంది. యూఎస్‌లోనూ ఈ వైరస్ ప్రభావం చాలా ఎక్కువగా ఉంది. ఇప్పటికే అక్కడ కరోనా పాజిటివ్ కేసులు 3 లక్షలకు పైగా నమోదయ్యాయి. సుమారు 10వేల మంది మృత్యువాత పడ్డారు. ఒక్క న్యూయార్క్ సిటీలోనే సుమారు 1500 మంది కరోనాతో మరణించారు. ప్రస్తుతం న్యూయార్క్‌లో పరిస్థితి అత్యంత దారుణంగా ఉందని అక్కడ నివసిస్తోన్న ఒకప్పటి హీరోయిన్ మాన్య చెప్పారు. మాన్య తెలుగుమ్మాయే. కన్నడ ఇండస్ట్రీ ద్వారా వెండితెరకు పరిచయమయ్యారు. తెలుగులో ‘సీతారామరాజు’ సినిమాలో నాగార్జున చెల్లెలిగా నటించారు. ఆ తరవాత సుమారు పది సినిమాల్లో చేశారు. కొలంబియా యూనివర్సిటీలో ఉన్నత విద్యను అభ్యసించిన మాన్య.. ఎన్ఆర్ఐ సత్య పటేల్‌ను 2008లో పెళ్లాడారు. నాలుగేళ్ల వైవాహిక జీవితం తరవాత 2012లో సత్య పటేల్‌ నుంచి మాన్య విడాకులు తీసుకున్నారు. అయితే, 2013లో వికాష్ బాజ్‌పాయ్‌ను మాన్య రెండో పెళ్లి చేసుకున్నారు. ఆమె ఒక సెల్ఫీ వీడియోను రికార్డు చేసి వివరాలను వెల్లడించారు.‘‘10 సంవత్సరాల ముందు నేను తెలుగు, కన్నడ, మలయాళం, తమిళ సినిమాల్లో హీరోయిన్‌గా నటించాను. ప్రస్తుతానికి నేను ఫైనాన్స్ ప్రొఫెషనల్‌గా న్యూయార్క్ సిటీలో పనిచేస్తున్నాను. మా ఇల్లు న్యూయార్క్ సిటీలోని టైమ్ స్క్వేర్‌కు దగ్గరలోనే ఉంది. ఇప్పుడు ఇక్కడ పరిస్థితి దారుణంగా ఉంది. ట్రై స్టేట్ ఏరియాలో సుమారు ఒక లక్షా ఇరవై వేల మందికి కరోనా సోకినట్టు నిర్ధారణ అయ్యింది. వారిలో 2,800 మంది చనిపోయారు. న్యూయార్క్ సిటీలోనే 15వేల మందికి కరోనా సోకింది. సుమారుగా 1400 మంది మృతిచెందారు. కరోనా బాధితుల్లో డాక్టర్లు, నర్సులు, ఇతర వైద్య సిబ్బంది ఉన్నారు. ఏడు వారాల చిన్నారి కరోనాతో చనిపోయింది” అని తెలిపారు. న్యూయార్క్‌లో రోజురోజుకి పాజిటివ్ కేసులు, మరణాలు పెరిగిపోతోన్న నేపథ్యంలో శవాలను కుటుంబ సభ్యులకు కూడా చూపించడం లేదని మాన్య చెప్పారు. ట్రక్కుల్లో ఐస్ వేసి డెడ్ బాడీస్‌ను డిస్పోజ్ చేస్తున్నారని వెల్లడించారు. కనీసం మృతదేహాన్ని తాకనివ్వడం లేదని.. ఒక క్రేన్‌తో బాడీని ట్రక్కులో వేస్తున్నారని తెలిపారు. తన ఫ్రెండ్ వాళ్ల నాన్న చనిపోతే.. చివరిచూపు చూసుకోవడం కూడా కుదరలేదని చెప్పారు. ప్రస్తుతమైతే న్యూయార్క్‌లో పరిస్థితి అత్యంత దారుణంగా ఉందన్నారు. ప్రపంచంలోనే అందమైన నగరాల్లో ఒకటైన న్యూయార్క్ సిటీని ఇలాంటి స్థితిలో చూస్తాననుకోలేదని అన్నారు.