హీరో సుమన్ రియల్ హీరో అని పలు సందర్భాల్లో నిరూపించుకున్నారు. ఒకటి కాదు రెండు కాదు ఏకంగా 175 ఎకరాల భూమిని జవాన్లకు డొనేట్ చేసి అప్పట్లో తన మంచి మనసు చాటుకున్నారు సుమన్. ఆ భూమిపై కేసు నడుస్తున్న సందర్భంలో ఆసక్తికరమైన విషయాలను షేర్ చేసుకున్నారు హీరో సుమన్. అంతేకాదు పూర్తి స్థాయిలో యాక్షన్ సినిమా చేయడానికి రెడీగా ఉన్నానని.. మార్షల్ ఆర్ట్స్ నేపథ్యంలో సినిమా చేయాలని ఉందంటూ తన మనసులో కోరికను బయటపెట్టారు సుమన్. మెగాస్టార్ చిరంజీవి, వెంకటేష్, బాలక్రిష్ణ, నాగార్జున లాంటి హీరోలను ధీటుగా ఎదుర్కొని తన యాక్షన్ సినిమాలతో ప్రేక్షకుల్ని అలరించారు. ఆయన కెరియర్ పీక్స్‌లో ఉన్న సందర్భంలో అనూహ్య పరిస్థితుల మధ్య సుమన్‌కు మెల్లమెల్లగా అవకాశాలు తగ్గిపోయాయి. అయితే కొంతమంది స్టార్ హీరోలు కావాలనే సుమన్‌ని తొక్కేశారని ఆయన్ని కేసులో ఇరికించారనే ప్రచారం కూడా నేటికి ఉంది. వీటిలో వాస్తవం ఎంతనే విషయం పక్కనపెట్టేస్తే.. మార్షల్ ఆర్ట్స్ హీరోగా సుమన్ చేసిన యాక్షన్ సినిమాలు టాలీవుడ్‌లో మరే హీరో చేయలేకపోయారు.
ఆయన మాట్లాడుతూ.. ‘నేను యాక్షన్ సినిమాలు చేయడానికి ఇప్పటికీ రెడీగానే ఉన్నాను. కాని నేను కష్టాలతో ఉన్నాను సినిమా తీయండి అంటే ఎవరూ ముందుకు రారు. కష్టాల్లో ఉన్నప్పుడు సినిమా తీయకూడదు.. ఈ సినిమా బిజినెస్ ఎలా ఉంది అంటే అప్పులు చేసి సినిమా తీయకూడదు. డంప్ మనీలా ఉంది. ఈరోజుల్లో యాక్షన్ సినిమా చేయాలంటే కనీసం బాలీవుడ్‌తో అయినా మ్యాచ్ కావాలి. హాలీవుడ్ రేంజ్ కాకపోయినా బాలీవుడ్ మాదిరైనా చేయగలగాలి. యాక్షన్ సీక్వెన్స్ చేసేటప్పుడు దానికి బడ్జెట్ పెట్టేసి ఇంతలోనే తీసెయ్ అంటే ఫైట్ మాస్టర్ తీయలేడు. క్వాలిటీ రాదు.
ఇదో పెయింటింగ్ లాంటిది. నాకు మహాభారతం కావాలి.. ఇంతలో చేయి అంటే ఎలా సాధ్యం అవుతుంది. కాని యాక్షన్స్‌కి ఖర్చు చేయాలనే నిర్మాత వస్తే నేను చేయొచ్చు. అలాంటి మెంటాలిటీ ఉండి అర్ధం చేసుకునే ప్రొడ్యుసర్ వస్తే యాక్షన్ సినిమా చేయొచ్చు. నాకు సౌత్‌లో మంచి గుర్తింపు ఉంది. నా నుండి యాక్షన్ మూవీ వస్తుందంటే సేల్ అవుతుంది. ఫైట్స్ బాగా వస్తే పర్లేదు.. లేదంటే ప్రేక్షకులు డిజప్పాయింట్ అవుతారు. ఇది అర్ధం చేసుకుని ఎవరైనా వస్తే యాక్షన్ సినిమా చేయడానికి నేను రెడీగా ఉన్నాను.యాక్షన్ అంటే ఖచ్చితంగా మార్షల్ ఆర్ట్స్ ఉంటుంది. ప్రాపర్ మార్షల్ ఆర్ట్స్ ఫిల్మ్. రియాలిటీలో మార్షల్ ఆర్ట్స్‌లో టెక్నిక్స్ ఏంటని చూపిస్తాం. చైనీస్ సినిమాల్లో చూపించనట్టుగా మార్షల్ ఆర్ట్స్‌ని తెలుగులో ఎవరూ చూపించలేదు. హిందీలో టైగర్ ష్రాఫ్, విధ్యుత్ లాంటి వాళ్లు రియల్ మార్షల్ ఆర్ట్స్ చేస్తున్నారు. నూటికి నూరు శాతం కాకపోయినా కనీసం 70 శాతమైనా చేస్తున్నారు.
99 సినిమాలు చేశా.. వందో సినిమా చేస్తున్నా.. అయ్యప్ప సినిమా చేస్తున్నా. 99 సినిమాలు చేసిన తరువాత పెద్ద బ్రేక్ వచ్చింది. వందో సినిమా అయ్యప్ప సినిమా చేస్తున్నానంటే ఆయన బ్లెస్సింగ్‌గా భావిస్తున్నా. ఎంతో మంది అయ్యప్ప మాలలు వేసుకుంటున్నారు.. వారికి చాలా డౌట్లు ఉన్నాయి. పూజ ఎందుకు చేస్తున్నారు? గురు స్వామి అంటే ఎలా ఉండాలి? ఏం చేయాలి? అప్పప్ప పూజ ఎందుకు ఏమిటి? ఎలాంటి వస్తువులను పూజలో వాడాలి? లాంటి చాలా విషయాలను చెప్పబోతున్నాం. అయ్యప్ప పూజకు దేవుడికి కనెక్షన్ ఏంటి అన్నది సినిమా చూసి తెలుసుకోవచ్చు.
నేను సంపాదించిన ఆస్తిలో 175 ఎకరాలు సైనికుల కోసం ఇవ్వడం త్యాగం అని నేను అనుకోను నా బాధ్యతగా భావించా. అందుకే దేశాన్ని రక్షించే సైనికులకు 175 ఎకరాలను ఇచ్చేశా. కార్గిల్ యుద్ధం వచ్చినప్పుడు సాయం చేయాలని అన్నప్పుడు అందరూ స్పందించి లక్ష, రెండు లక్షలు, ఐదు లక్షలు ఇలా ఎవరికి తోచింది వాళ్లు డొనేట్ చేశారు. ఆ సందర్భంలో మీడియా వాళ్లు మీరు ఏం డొనేట్ చేస్తారని అడిగినప్పుడు నేను మా ఇంటికి ఫోన్ చేసి అడిగా.. నా భార్య ఈ భూమిని డొనేట్ చేద్దాం అని చెప్పింది. సైనికుల వెల్ఫేర్‌కి ఆ భూమిని ఉపయోగిస్తాం అన్నారు. అయితే ఆ భూమిపై కేసు నడుస్తోంది. అయితే అందులో ఎంత భూమి వచ్చినా దాన్ని సైనికులకే ఇచ్చేస్తాం.
నేను ఈ నిర్ణయం తీసుకోవడానికి ప్రధాన కారణం ఏంటంటే.. దేశ సరిహద్దుల్లో జవానులు అన్నింటికీ ఓర్చుకుని మనల్ని రక్షిస్తున్నారు. వాళ్లలా మనం ఒక్కరోజు కూడా పనిచేయలేం. ఫ్యామిలీస్‌కి దూరంగా మనకోసం బార్డర్‌లో అన్నీ త్యాగం చేస్తున్నారు. వాళ్లను చూసినప్పుడు వాళ్లకోసం ఏదైనా చేయాలనిపించింది. అందుకే నా భార్యతో చర్చించి ఈ నిర్ణయం తీసుకున్నాం.నిజానికి ఆ డొనేట్ చేసిన స్థలాన్ని ఔట్ డోర్ స్టుడియోగా చేద్దాం అనుకున్నాం. కాని నా భార్య సైనికులకు ఇచ్చేద్దాం అన్నారు. మేం ఇలా ఒక అడుగు ముందుకు వేస్తే.. మరికొంత మంది ముందుకు వస్తారనే ఆలోచనతో ఆ పనిచేశాం. మరికొన్నిరోజుల్లో ఈ స్థలం క్లియర్ అవుతుంది. అప్పుడు ప్రెస్ మీట్ పెట్టి అన్ని పత్రాలను సబ్‌మిట్ చేస్తా’ అంటూ చెప్పుకొచ్చారు హీరో సుమన్.